اپنے ہی بنائے معیار سے گرنے کی وجہ کیا ہے؟ نعمان اعجاز

?️ 28 اگست 2021

کراچی (سچ خبریں) پاکستان شوبز انڈسٹری کے سینئر اداکار نعمان اعجاز نے موجودہ دُنیا کے حالات پر تبصرہ کرتے ہوئے ایک اہم سوال اُٹھایا ہے کہ ہم دن بدن اپنے ہی بنائے ہوئے معیار سے کیوں گِرتے جارہے ہیں۔انہوں نے یہ سوال ایک تصویر شیئر کرکے پوچھا جس میں انہوں نے اپنے سر پر ٹوپی پہنی ہوئی ہے۔

سوشل میڈیا پر زیادہ متحرک رہنے والے اور معنی خیز پیغامات جاری کرکے مداحوں کی تعریفیں سمیٹنے والے سینئر اداکار نعمان اعجاز نے اپنے آفیشل انسٹاگرام اکاؤنٹ پر نئی تصویر شیئر کی ہے۔انسٹاگرام پر شیئر کی گئی تصویر نعمان اعجاز کے کسی ڈرامے کے ایک منظر کی ہے جس میں اُنہوں نے سر پر ٹوپی پہنی ہوئی ہے۔نعمان اعجاز نے اپنی پوسٹ کو کیپشن دیتے ہوئے لکھا کہ ’میں یہ سوچتا ہوں کہ جب قیامت کے دن کوئی انسان کسی کا نہیں ہوگا تو یہ بات ابھی سے ہی اتنےعروج پر کیوں ہے؟

اداکار نے سوالیہ انداز میں کہا کہ ’ہم دن بدن اپنے ہی بنائے ہوئے معیار سے کیوں گِرتے جارہے ہیں۔‘واضح رہے کہ نعمان اعجاز کے معنی خیز پیغامات کو ناصرف پاکستانی مداح پسند کرتے ہیں بلکہ بھارت سے بھی اداکار کے لیے محبت بھرے پیغامات بھیجے جاتے ہیں۔اس ضمن میں نعمان اعجاز کو بھارت سے خاتون مداح نے محبت بھرا پیغام بھیجا تھا۔

رِضا خان نامی بھارتی صارف نے نعمان اعجاز کی پوسٹ پر کمنٹ کرتے ہوئے لکھا تھا کہ ’میں آپ کی بہت بڑی مداح ہوں اور میں بھارتی ہونے کے باوجود بھی آپ سے پہلے کسی بھی اداکار کی مداح نہیں رہی ہوں۔‘بھارتی مداح کے احترام اور محبت کا جواب دیتے ہوئے نعمان اعجاز نے اُن کا شکریہ ادا کیا اور کہا تھا کہ ’بھارت سے مداح ہونا، اُن کے لیے ایک اعزاز ہے۔