آریان خان کے وکلا ہائی کورٹ سے رجوع کر سکتے ہیں

🗓️ 20 اکتوبر 2021

ممبئی (سچ خبریں) منشیات رکھنے اور استعمال کرنے کے الزام میں گرفتار بولی وڈ اداکار شاہ رخ خان کے بیٹے آریان خان کی ضمانت کی درخواست ممبئی کی سیشن کورٹ نے بھی مسترد کر دی ہے ۔سیشن کورٹ نے آریان خان کی درخواست ضمانت پر گزشتہ ہفتے 14 اکتوبر کو فیصلہ محفوظ کیا تھا، جسے 20 اکتوبر کی دوپہر کو سنایا گیا۔ آریان خان کو تین اکتوبر کو گرفتار کیا گیا تھا۔

بھارتی اخبار ’ٹائمز آف انڈیا‘ کے مطابق سیشن کورٹ نے آریان خان کی درخواست ضمانت مسترد کرتے ہوئے انہیں عدالتی ریمانڈ پر جیل میں رہنے کا حکم دیا۔آریان خان 7 اکتوبر سے 14 دن کے عدالتی ریمانڈ پر جیل میں ہیں اور ان کا ریمانڈ 21 اکتوبر تک ختم ہوگا، جس کے بعد انہیں دوبارہ عدالت میں پیش کیا جائے گا۔

خیال کیا جا رہا ہے کہ عدالتی ریمانڈ ختم ہونے پر انہیں ضمانت دی جا سکتی ہے، تاہم اس حوالے سے کچھ بھی کہنا قبل از وقت ہے۔سیشن کورٹ کی جانب سے بھی ضمانت درخواست مسترد کیے جانے کے بعد اب آریان خان کے وکلا ہائی کورٹ سے رجوع کر سکتے ہیں، تاہم فوری طور پر یہ کہنا قبل از وقت ہے کہ بولی وڈ اداکار کے بیٹے کے وکلا اعلیٰ عدالت سے کب تک رجوع کردیں گے۔

سیشن کورٹ سے قبل میٹروپولیٹن عدالت نے بھی آریان خان کی ضمانت 7 اکتوبر کو مسترد کرتے ہوئے انہیں عدالتی ریمانڈ پر جیل بھیجا تھا، جس کے بعد اب ان کا کیس سیشن کورٹ میں چل رہا ہے۔

آریان خان نے سیشن کورٹ میں 9 اکتوبر کو ضمانت درخواست دائر کی تھی، جس کے بعد 11 اکتوبر کو ان کی درخواست پر سماعت نہیں ہوسکی تھی اور 14 اکتوبر کو ہونے والی سماعت میں عدالت نے ان کی درخواست پر فیصلہ محفوظ کیا تھا، جسے 20 اکتوبر کو سنایا گیا۔