ن لیگ پی ٹی آئی کے ساتھ کیا کر رہی ہے؟عمر ایوب

?️ 3 اگست 2024

سچ خبریں: قومی اسمبلی میں اپوزیشن لیڈر عمر ایوب نے بیان دیا ہے کہ پاکستان تحریک انصاف کے بانی نے واضح کیا ہے کہ فوج عوام ہی کا حصہ ہے، جبکہ مسلم لیگ ن اور پیپلز پارٹی فوج اور پی ٹی آئی کے درمیان دوریاں پیدا کرنے کی کوشش کر رہی ہیں۔

اڈیالہ جیل کے باہر میڈیا سے بات کرتے ہوئے عمر ایوب نے بتایا کہ بانی پی ٹی آئی نے 5 اگست کو صوابی میں ہونے والے جلسے کے بارے میں پیغام دیا ہے، جس کی میزبانی علی امین گنڈاپور کریں گے۔

یہ بھی پڑھیں: ملک کیلئے آرمی چیف کو خط لکھوں گا، فوج اور عوام کو سامنے نہیں آنا چاہیے، بانی پی ٹی آئی

اپوزیشن لیڈر نے مزید کہا کہ بانی پی ٹی آئی کی رہائی کے لیے ہم اڈیالہ جیل پر راکٹ لانچرز سے حملہ نہیں کر سکتے، اور چیف جسٹس اسلام آباد ہائیکورٹ کو بانی پی ٹی آئی کے مقدمات سے الگ ہونا چاہیے۔

انہوں نے کہا کہ بشریٰ بی بی کی رہائی ہونی چاہیے تھی، لیکن نیب نے ایسا نہیں ہونے دیا، عدالتی نظام کو بانی پی ٹی آئی کے ساتھ انصاف کرنا چاہیے۔

عمر ایوب نے واضح کیا کہ پیپلز پارٹی اور ن لیگ نے مہنگے پاور پلانٹس لگائے ہیں اور آصف زرداری نے ایوان صدر کے بجٹ میں 88 کروڑ روپے کا اضافہ کیا ہے، عوام کے لیے ٹیکسز جبکہ اپنے لیے مزے ہیں۔

انہوں نے کہا کہ نواز شریف ملک میں اس وقت تک واپس نہیں آئے جب تک بندیال چیف جسٹس تھے، اور وہ اس وقت آئے جب فائز عیسیٰ چیف جسٹس بنے۔

عمر ایوب نے کہا کہ چیف جسٹس فائز عیسیٰ کی اہلیہ نے بانی پی ٹی آئی کے خلاف آرٹیکل لکھے ہیں، جبکہ بشریٰ بی بی کا توشہ خانہ کیس میں کوئی لین دین نہیں۔

عمر ایوب نے بتایا کہ رؤف حسن کو سی ٹی ڈی نے حراست میں رکھا ہے اور ان کے خلاف وارنٹ گرفتاری جاری ہے۔ حاجی امتیاز کے پروڈکشن آرڈر کے لیے اسپیکر سے رجوع کیا، لیکن اگلے ہی دن انٹیلی جنس ایجنسی کے لوگ حاجی امتیاز کو اینٹی کرپشن سے لے گئے۔ رؤف حسن ضعیف العمر شخص ہیں اور انہیں سی ٹی ڈی کے حوالے کیا گیا ہے۔

مزید پڑھیں: پاک فوج عوام کی توقعات پر پورا اترنے کیلئے ہر اقدام کرے گی: آرمی چیف

پی ٹی آئی رہنما نے کہا کہ ایران میں حماس کے رہنما کو شہید کیا گیا، جس سے مسلمانوں کے دلوں میں غم و غصہ بڑھتا ہے۔ بانی پی ٹی آئی نے اسماعیل ہنیہ کے قتل کی مذمت کی ہے۔