عمران خان کے خلاف مقدمات کے بارے میں امریکہ کا بیان

?️ 2 جولائی 2024

سچ خبریں: امریکہ  نے ایک بار پھر پاکستان تحریک انصاف کے بانی کے خلاف مقدمات کو پاکستان کا اندرونی معاملہ قرار دیتے ہوئے حکومت پر زور دیا ہے کہ انسانی حقوق اور بنیادی آزادیوں کا احترام کرے۔

واشنگٹن میں امریکی محکمہ خارجہ کے نائب ترجمان ویدانت پٹیل نے پریس کانفرنس کے دوران پی ٹی آئی کے بانی سے متعلق سوال کے جواب میں کہا کہ ان کے خلاف مقدمات پاکستان کا اندرونی معاملہ ہیں۔ ہم حکومت پاکستان پر زور دیتے ہیں کہ وہ انسانی حقوق اور بنیادی آزادیوں کا احترام کرے۔

یہ بھی پڑھیں: 9 مئی جلاؤ گھیراؤ کیس: عدالت نے عمران خان کو 2 مقدمات میں بری کردیا

پاکستان سے متعلق امریکی کانگریس کی قرارداد کے بارے میں بات کرتے ہوئے ویدانت پٹیل نے کہا کہ ہم زیر التوا کانگریسی قانون سازی پر بات نہیں کرتے۔ ہمارے جمہوری نظام میں کانگریس حکومت کی ایک الگ شاخ ہے۔

ترجمان نے مزید کہا کہ ہم انتخابی دھاندلی کے معاملے کو پاکستانی شراکت داروں سے اٹھاتے رہے ہیں۔ امریکا پاکستان میں انتخابات کی شفافیت کے معاملے پر خصوصی توجہ دیتا ہے۔

پاک بھارت تعلقات کے بارے میں سوال پر ویدانت پٹیل کا کہنا تھا کہ پاکستان اور بھارت کو اپنے معاملات خود طے کرنے ہیں۔ امریکا دنیا بھر میں پڑوسی ممالک کے درمیان بات چیت کی حوصلہ افزائی کرتا ہے۔

یاد رہے کہ امریکی محکمہ خارجہ کے ترجمان میتھیو ملر نے کہا تھا کہ پی ٹی آئی کے بانی کی رہائی کا فیصلہ حکومت پاکستان کو کرنا ہے اور ہم اس معاملے پر کوئی پوزیشن نہیں لیتے۔

مزید پڑھیں: آزادی مارچ توڑ پھوڑ کیس: عمران خان، شیخ رشید و دیگر کی بریت کی درخواست پر وکلا کے دلائل مکمل

انہوں نے کہا کہ پاکستان میں انتخابات سے متعلق ہمارا کوئی موقف نہیں ہے اور نہ ہی ہم پاکستان میں کسی خاص سیاسی جماعت کے بارے میں کوئی پوزیشن لیتے ہیں۔ ہم صرف یہ چاہتے ہیں کہ بنیادی انسانی حقوق کو برقرار رکھا جائے۔