بیرون ملک مقیم پاکستانیوں کے لیے خوشخبری

?️ 23 جون 2024

سچ خبریں: پنجاب کی تاریخ میں پہلی مرتبہ بیرون ملک رہنے والے پاکستانیوں کے لیے جائیداد کی خرید و فروخت کی سہولت قانونی پیچیدگیوں کے بغیر فراہم کی گئی ہے۔

بیرون ملک مقیم پاکستانیوں کو سہولت دینے کے لیے 116 سال پرانے قانون میں ترمیم کا ڈرافٹ تیار کیا گیا ہے۔ اب بیرون ملک مقیم پاکستانی سیل ڈیڈ کے لیے اپنا بیان سفارتخانے میں قلمبند کروا سکیں گے، جس سے انہیں وقت اور سفری اخراجات کی مد میں کروڑوں روپے کی بچت ہوگی۔

یہ بھی پڑھیں: ایف آئی اے نے پاکستان سے باہر رہنے والے تمام پاکستانی نژاد تارکین وطن کو خبردار کر دیا

معتبر ذرائع نے بتایا کہ رجسٹریشن ایکٹ 1908 کے سیکشن 31 میں ترمیم کا فیصلہ کیا گیا ہے۔ اس ترمیم کے بعد، کوئی بھی اوورسیز پاکستانی جائیداد کی خرید و فروخت کے لیے پاکستان آنے کے بجائے سیل ڈیڈ کے لیے اپنا بیان پاکستانی سفارتخانے میں قلمبند کروا سکے گا۔

اس سے قبل رجسٹریشن ایکٹ 1908 کے سیکشن 31 کے تحت، اوورسیز پاکستانیوں کو جائیداد خریدنے یا بیچنے کے لیے متعلقہ سفارتخانوں میں جاکر اپنا پاور آف اٹارنی رجسٹر کروا کر پاکستان بھجوانا پڑتا تھا، اور پھر پاکستان میں موجود جس شخص کے نام وہ پاور آف اٹارنی بھیجی جاتی تھی، وہ رجسٹرار کے روبرو جائیداد خریدنے یا بیچنے کا مجاز مانا جاتا تھا۔

مزید پڑھیں: قطر میں کفالہ نظام کا خاتمہ، پاکستانی مزدوروں کے لیئے اہم خوشخبری

اس پرانے قانون کی وجہ سے اوورسیز پاکستانیوں کو جائیداد کی خرید و فروخت میں متعدد قانونی پیچیدگیوں کے علاوہ بعض اوقات دھوکہ دہی اور فراڈ کا سامنا کرنا پڑتا تھا۔