وفاقی کابینہ کا اجلاس طلب؛ وجہ؟

?️ 22 جولائی 2024

سچ خبریں: وزیراعظم شہباز شریف نے کل وفاقی کابینہ کا ایک انتہائی اہم اجلاس طلب کیا ہے جس میں پی ٹی آئی پر پابندی لگانے کی منظوری لی جائے گی۔

ذرائع کے مطابق اس اجلاس کی صدارت وزیراعظم شہباز شریف خود کریں گے، اور اس میں پی ٹی آئی پر پابندی لگانے کی منظوری لی جائے گی۔

یہ بھی پڑھیں: وفاقی کابینہ نے قومی سلامتی کمیٹی کےفیصلوں کی توثیق کر دی

مزید یہ بھی بتایا جا رہا ہے کہ اجلاس میں بانی چیئرمین پی ٹی آئی عمران خان، سابق صدر عارف علوی، اور سابق ڈپٹی اسپیکر قاسم سوری کے خلاف آرٹیکل 6 کے تحت کارروائی کی منظوری بھی دی جائے گی۔

چند روز قبل وفاقی وزیر اطلاعات و نشریات عطا تارڑ نے اسلام آباد میں ایک پریس کانفرنس میں کہا تھا کہ حکومت نے پی ٹی آئی پر پابندی لگانے اور عمران خان، عارف علوی، اور قاسم سوری پر آرٹیکل 6 کے تحت غداری کے مقدمات چلانے کا فیصلہ کیا ہے۔

تاہم اس فیصلے پر مسلم لیگ ن کے اتحادیوں نے اعتراض کرتے ہوئے کہا تھا کہ انہیں اس معاملے پر اعتماد میں نہیں لیا گیا، جس پر وزیراعظم شہباز شریف نے اتحادیوں کو اعتماد میں لینے کے لیے مسلم لیگ ن کی ایک کمیٹی تشکیل دی تھی۔

دونوں جماعتوں کے درمیان ایک اجلاس بھی ہوا تھا جس میں پاکستان پیپلز پارٹی نے پی ٹی آئی پر پابندی کے لیے سینٹرل ایگزیکٹو کمیٹی کا اجلاس بلانے کا اعلان کیا تھا۔

مزید پڑھیں: وفاقی کابینہ کا بھی فیض آباد دھرنا کمیشن رپورٹ پر عدم اعتماد کا اظہار

گزشتہ روز ایک بار پھر وزیر اطلاعات عطا تارڑ نے اعلان کیا کہ پیپلز پارٹی، پاکستان تحریک انصاف پر پابندی کے معاملے پر حکومت کے ساتھ ہے۔