الیکشن کمیشن نے غلطی تسلیم کر لی

🗓️ 15 جولائی 2022

لاہور: (سچ خبریں)لاہورہائیکورٹ میں ووٹر لسٹوں میں غلطی کے خلاف درخواست پر سماعت ہوئی۔عدالت نے پی ٹی آئی رہنما یاسمین راشد کی درخواست نمٹا دی۔

میڈیا رپورٹس کے مطابق صوبائی الیکشن کمشنر نے کہا کہ الیکشن 2020 کی ووٹر لسٹ پر ہوگا ۔ڈیٹا انٹری انسانی غلطی تھی جسے ٹھیک کردیا گیا ہے ۔ووٹر لسٹ پر غلطی سے پرنٹنگ دو جون کی تاریخ لکھی گئی۔

اپ ڈیٹ ہونے والی لسٹ عام انتخابات کیلئے ہے۔ڈیٹا آپریٹر کی غلطی سے 40 لاکھ لوگوں کو فوت شدگان لکھا گیا۔ الیکشن کمشنر نے مزید کہا کہ الیکشن 25 مئی 2022 کی ووٹر لسٹ پر ہو گا۔ڈیٹا انٹری انسانی غلطی تھی جسے ٹھیک کر دیا گیا۔ جب کہ درخواست گزار نے یہ موقف اپنایا تھا کہ الیکشن کمیشن نے زندہ لوگوں کو مردہ کردیا ۔

عدالتی فیصلے کی روشنی میں الیکشن کروائیں ۔

دوسری جانب لاہور ہائیکورٹ میں تحریک انصاف نے الیکشن کمیشن کے خلاف پٹیشن دائر کر دی۔ درخواست میں موقف اختیار کیا گیا کہ الیکشن کمیشن پولنگ ایجنٹس کے نام مسترد کر رہا ہے۔ جبکہ الیکشن کمیشن کہہ رہا ہے کہ صرف حلقے سے پولنگ ایجنٹ ہونا چاہیے۔ درخواست میں کہا گیا کہ قانون کےمطابق امیدوار جس کو چاہے ایجنٹ نامزد کرے۔ شناختی کارڈ کے عارضی یا مستقل پتہ کے بغیر کوئی ووٹ متعلقہ حلقے میں شفٹ نہیں ہو سکتا۔

درخواست میں استدعا کی گئی کہ عدالت الیکشن کمیشن کو پولنگ ایجنٹس کے تقرر کرنے کا حکم دے۔ واضح رہے کہ ضمنی الیکشن سے پہلے تحریک انصاف الیکشن کمیشن پر جانبدار ہونے کا الزام لگا رہی ہے،جبکہ ووٹ ایک حلقے سے دوسرے حلقے میں منتقل کئے جانے کے بیانات بھی دئیے جا رہے ہیں۔ گزشتہ دنوں سابق وزیراعظم اور چیئرمین تحریک انصاف عمران خان نے الیکشن کمیشن کو جانبدار قرار دیتے ہوئے کہا تھا کہ الیکشن کمیشن پوری طرح سے حمزہ شہباز کیساتھ ملکر لوٹوں کو جتوانے کی کوشش کررہا ہے۔