کھلاڑی میدان میں ہر چیز کیلئےتیار ہوتا ہے: وزیراعظم

?️ 17 نومبر 2021

اسلام آباد(سچ خبریں) وزیراعظم عمران خان نے کہا کہ جب کھلاڑی میدان میں اترتا ہے وہ ہر چیز کیلئےتیار ہوتا ہے میدان میں کھلاڑی کہتا ہے کہ مخالف جو بھی کرے گا میں اس سے بہتر کرنے کی کوشش کروں گا ان خیالات کا اظہار وزیر اعظم نے پارلیمنٹ کے مشترکہ اجلاس کے حوالے سے کیا ۔

تفصیلات کے مطابق پاکستان کی پارلیمانی تاریخ کیلئے بڑا دن ہے ، بڑی قانون سازی کیلئے پارلیمنٹ کا مشترکہ اجلاس کچھ دیر میں شروع ہوگا، وزیراعظم عمران خان پارلیمنٹ ہاؤس پہنچ گئے ہیں۔اس موقع پر وزیراعظم عمران خان نے میڈیا سے گفتگو کی ، اس کے دوران صحافی نے سوال کیا کہ آپ اتنی ملاقاتیں کررہے ہیں کوئی پریشانی تو نہیں؟ جس پر عمران خان نے حیرانگی کا اظہار کرتے ہوئے کہا کس سے ملاقاتیں کررہا ہوں؟

صحافی نے وزیراعظم سے سوال کیا کہ اپوزیشن کہتی ہے آج آپکو سرپرائز ملے گا، جس پر عمران خان نے جواب دیا کہ جب کھلاڑی میدان میں اترتا ہے وہ ہر چیز کیلئےتیار ہوتا ہے، میدان میں کھلاڑی کہتا ہے جو بھی مخالف کرے گا ، میں اس سے بہترکروں گا۔

دوسری جانب وزیراعظم کی زیر صدارت تحریک انصاف کی پارلیمانی پارٹی کا اجلاس جاری ہے ، جس میں مشترکہ اجلاس میں حکومتی بلز کی منظوری کی حکمت عملی پرغور اور لائحہ عمل طے کیاجارہاہے۔پارلیمانی پارٹی اجلاس میں ارکان پارلیمنٹ کو قانون سازی پربریفنگ بھی دی جائے گی۔

یاد رہے گذشتہ روز پارلیمنٹ کے مشترکہ اجلاس کے سلسلے میں وزیر اعظم عمران خان کی ایک دل چسپ ویڈیو سامنے آئی تھی ، جس میں وزیر اعظم عمران خان نے صحافیوں کے سوالات پر دل چسپ جواب دیا تھا۔وزیر اعظم کا کہنا تھا کہ اسپورٹس مین جب گراؤنڈ میں قدم رکھتا ہے تو وہ ہمیشہ سمجھتا ہے کہ وہ جیتے گا۔