چینی کمپنی کو پاکستان میں شراب تیار کرنے کا لائسنس جاری کر دیا گیا

?️ 29 مارچ 2021

کراچی(سچ خبریں)چین کی ایک کمپنی کو پاکستان میں شراب تیار کرنے کا لائسنس جاری کردیا گیا ہے۔ یہ کمپنی لسبیلہ انڈسٹریل اسٹیٹ ڈویلپمنٹ اتھارٹی میں بلوچستان کے ساتھ مشترکہ منصوبے کے طور پر شروع کی گئی ہے۔چین میں شراب تیار کرنے کے وسیع تجربہ کے ساتھ ، یہ پہلی چینی کمپنی ہوگی جو پاکستان میں اپنا پلانٹ قائم کرے گی۔

ذرائع کے مطابق مذکورہ لائسنس ایکسائز، ٹیکسیشن اور محکمہ انسداد منشیات بلوچستان نے جاری کیا تھا۔ ۔ ھوئی کوسٹل بریوری اینڈ ڈسٹلری لمیٹڈ نامی کمپنی، حب (بلوچستان) کے پتے کے ساتھ سیکیورٹیز اینڈ ایکسچینج کمیشن آف پاکستان (ایس ای سی پی) کے ساتھ 30 اپریل 2020 کو رجسٹرڈ ہوئی ہے۔

یہ کمپنی دنیا کے مشہور برانڈز تیار کرنے کے لئے مشہور ہے اور وہ پاکستان میں اپنے دو مشہور برانڈز متعارف کروائے گی۔ مینوفیکچرنگ سے لے کر پیکیجنگ تک کا سارا عمل لسبیلہ میں واقع اس کے پلانٹ میں انجام پائے گا۔

اس حوالے سے موقف جانے کے لیےچینی کمپنی وئی کوسٹل بریوری اینڈ ڈسٹلری لمیٹڈ کے پاکستان میں ڈائر یکٹر نعمان علی خان سے جسارت نے متعدد بار رابط کرنے کی کوشش کی تاہم ان سے رابط نہیں ہوسکا ہے۔

واضح رہے کہ پاکستان میں سر عام شراب پینے اورکشید کرنے پر پابندی ہے لیکن اس کے باوجود غیرقانونی طور پر شراب بنانے اور بیچنے کا کاروبار روز بروز ترقی کرتا جا رہا ہے۔پاکستان میں ڈیروں اور گھروں میں واقع شراب بنانے والی ہزاروں بھٹیاں سالانہ بنیادوں پر لاکھوں لیٹر ’دیسی شراب‘ بناتی ہیں لیکن طلب ہے کہ کم ہوتی نظر نہیں آتی۔