پنجاب کیلئے نئے لوکل گورنمنٹ ایکٹ 2022 کا مسودہ منظور کر لیا گیا

?️ 23 جون 2022

لاہور(سچ خبریں) پنجاب کیلئے نئے لوکل گورنمنٹ ایکٹ 2022 کا مسودہ منظور کرلیا گیا، میٹروپولیٹن کارپوریشن کی تعداد11 کی بجائے9 ہوگی، یونین کونسل کی تعداد 4015 ہی ہوگی، ویلیج کونسل اور نیبرہڈ کونسل ختم کردیں گئیں۔

نجی ٹی وی  کے مطابق پنجاب کابینہ کے نئے لوکل گورنمنٹ ایکٹ 2022 کا مسودہ منظور کرلیا ہے، جس کے تحت بلدیاتی ایکٹ کے تحت میٹروپولیٹن کارپوریشن کی تعداد 11 کی بجائے 9 ہوگی، نئے بلدیاتی ایکٹ کے مسودے کے مطابق ٹاون کونسل کی تعداد 27 ہوگی، میونسپل کارپوریشن کی تعداد 16 کی بجائے 17 اور میونسپل کمیٹی کی 234 ہوگی، نئے بلدیاتی ایکٹ 2022 میں ڈسٹرکٹ  کونسل کی تعداد 35 ہی رکھی گئی۔

مسودے کے مطابق نئے بلدیاتی ایکٹ میں تحصیل کونسل کی تعداد 137 رکھی گئی، نئے بلدیاتی ایکٹ کے مطابق بلدیاتی نظام کی تعداد 459 ہوگی، یونین کونسل کی تعداد 2013 کے بلدیاتی ایکٹ کے مطابق 4015 ہی ہوگی، ویلیج کونسل اور نیبر ہڈ کونسل نئے بلدیاتی ایکٹ میں ختم کردیں گئیں۔

اسی طرح نئے بلدیاتی نظام کے تحت یونین کونسل خواتین کی دو ممبر ہوں گے، ایک ورکر، نوجوان اور خصوصی افراد کی نمائندگی کے لیے ممبر مقرر کیا جائے گا۔

دوسری جانب الیکشن کمیشن نے وفاقی دارالحکومت اسلام آباد میں نئی بلدیاتی حلقہ بندیوں کے لئے شیڈول جاری کردیا۔نئی حلقہ بندیوں کی حتمی اشاعت شیڈول کے مطابق نقشہ جات اور متعلقہ ڈیٹا سمیت دیگر خریداری اور انتظامی انتظامات 23 سے 27 جون تک 5 روز میں مکمل ہوں گے۔ ابتدائی وارڈز و حلقہ کی فہرست کی تیاری کے کام کے لئے 24 دن مختص کئے ہیں، یہ کام 28 جون سے شروع ہوکر 27 جولائی تک مکمل ہوگا۔ ان وارڈز اور حلقہ بندیوں پر اعتراضات 23 جولائی سے 7 اگست تک داخل کئے جاسکیں گے جن پر فیصلے 29 اگست تک ہوں گے۔ وارڈز اور حلقہ جات کی حتمی فہرست 26 اگست کو جاری ہوگی۔