وفاقی کابینہ میں تین نئی تقرریاں کر دی گئیں

?️ 29 اپریل 2021

اسلام آباد(سچ خبریں) وفاقی کابینہ میں تین نئی تقرریوں کا نوٹیفیکیشن جاری کردیا گیا ہے، نئی تقرریاں کرتے ہوئے رکن قومی اسمبلی فرخ حبیب وزیر مملکت برائے اطلاعات و نشریات ، عثمان ڈار دوبارہ وزیراعظم کے معاون خصوصی برائےیوتھ افیئرز اور ، وقار مسعود وزیراعظم کے معاون خصوصی برائے خزانہ و ریونیو مقرر کردیا گیا۔

تفصیلات کے مطابق وفاقی کابینہ میں تین نئی تقرریاں کردیں گئیں ، کابینہ ڈویژن نے تینوں نوٹی فکیشن جاری کردئیے ہیں۔نوٹیفکیشن میں کہا گیا کہ رکن قومی اسمبلی فرخ حبیب وزیر مملکت برائے اطلاعات و نشریات ، عثمان ڈار دوبارہ وزیراعظم کےمعاون خصوصی برائےیوتھ افیئرز مقرر کردیا۔

نوٹیفکیشن کے مطابق معاون خصوصی ڈاکٹر وقار مسعود کا عہدہ تبدیل کر دیا گیا، وقار مسعود وزیراعظم کے معاون خصوصی برائے خزانہ و ریونیو مقرر کیا گیا ہے ، ڈاکٹر وقار مسعود اس سےقبل وزیر اعظم کے معاون خصوصی ریونیو تھے۔اس سے قبل ایوان صدر اسلام آباد میں وزیرمملکت فرخ حبیب کی تقریب حلف برداری ہوئی ، جس میں صدرمملکت عارف علوی نے فرخ حبیب سے حلف لیا تھا۔

واضح رہے فرخ حبیب تحریک انصاف کے سینئر رہنماؤں میں شمار ہوتے ہیں اور میڈیا پر اپنی جماعت کی نمائندگی کرتے نظر آتے ہیں، وہ طلبہ تنظیم انصاف اسٹوڈنٹ فیڈریشن  (آئی ایس ایف) کے صدر بھی رہے ہیں جبکہ 2018 میں رکن قومی اسمبلی فیصل آباد سے منتخب ہوئے تھے۔