روس نے ہمارے بنیادی ڈھانچے کو نشانہ بنایا تو جواب دیں گے:امریکہ

?️ 29 اکتوبر 2022

سچ خبریں:وائٹ ہاؤس کے ایک عہدہ دار نے کہا کہ اگر روس نے امریکی سیٹلائٹ کو نشانہ بنایا تو اسے جوابی ردعمل کا سامنا کرنا پڑے گا۔

روئٹرز خبر رساں ادارے کی رپورٹ کے مطابق وائٹ ہاؤس کی قومی سلامتی کونسل کے کوآرڈینیٹر جان کربی نے روس پر نئے الزامات لگاتے ہوئے صحافیوں کو بتایا کہ اگر روس نے امریکی انفراسٹرکچر کو نشانہ بنایا تو اسے جوابی کارروائی کا سامنا کرنا پڑے گا۔

وائٹ ہاؤس کے اس اہلکار نے مزید کہا کہ اعلانیہ طور پر جاری کردہ معلومات سے پتہ چلتا ہے کہ روس اینٹی سیٹلائٹ خلائی ٹیکنالوجی کی تلاش میں ہے،کربی نے چین میں شی جن پنگ کی صدارت کی تیسری مدت کے آغاز کے بارے میں یہ بھی کہا کہ امریکی حکومت ان کے ساتھ مواصلاتی ذرائع برقرار رکھنا چاہے گی۔

واضح رہے کہ انہوں نے G20 اجلاس کے موقع پر چین اور امریکہ کے رہنماؤں کے درمیان ممکنہ ملاقات کے بارے میں کوئی وضاحت فراہم نہیں کی، یاد رہے کہ ایک سینئر روسی سفارت کار نے حال ہی میں اقوام متحدہ کے اجلاس میں کہا تھا کہ مغربی ممالک دنیا پر اپنی برتری مسلط کرنے کے لیے خلا کو استعمال کرنا چاہتے ہیں۔

روسی عہدہ دار نے روس کے خلاف جنگ میں یوکرینیوں کی مدد کے لیے مغربی سیٹلائٹ کے استعمال کا حوالہ دیتے ہوئے ان کارروائیوں کو انتہائی خطرناک عمل قرار دیا اور خبردار کیا کہ یہ روسی جوابی حملوں کے لیے جائز ہدف ہو سکتے ہیں۔