اسلام آباد (سچ خبریں) وفاقی وزیرِ اطلاعات و نشریات فواد چوہدری کا کہنا ہے کہ نبیٔ کریم حضرت محمد ﷺ کی حیات طیبہ اور سیرت نا صرف مسلمانوں بلکہ تمام انسانیت کے لئے مشعلِ راہ اور عمدہ مثال ہے۔آپﷺ کی سیرت پر عمل پیرا ہونا ہی دنیا اور آخرت میں کامیابی کا ضامن ہے۔
وفاقی وزیرِ اطلاعات و نشریات فواد چوہدری نے یہ بات 12 ربیع الاوّل یومِ ولادتِ رسولِ کریم ﷺ کے موقع پر جاری کیئے گئے پیغام میں کہی ہے۔انہوں نے کہا ہے کہ آپ ﷺ کے اسوۂ حسنہ پر عمل ہی دنیا و آخرت میں کامیابی کا ضامن ہے، ہماری کوشش ہے کہ ہم ریاستِ مدینہ کے تصور سے پوری طرح رہنمائی حاصل کریں۔
فواد چوہدری کا مزید کہنا ہے کہ اب منزل زیادہ دور نہیں، بہت جلد اس کے مثبت اثرات مرتب ہوں گے، ہمیں اسوۂ حسنہ سے رہنمائی لے کر معاشرے میں امن و بھائی چارے کو فروغ دینا ہے۔وفاقی وزیرِ اطلاعات و نشریات کا یہ بھی کہنا ہے کہ خاتم النبیین ﷺ کی حیاتِ طیبہ ناصرف مسلمانوں بلکہ تمام انسانیت کے لیے عمدہ مثال ہے۔
واضح رہے کہ آج ملک بھر میں یوم ولادت رسول کریم ﷺ کی مناسبت سے تقریبات کا اہتمام کیا گیا ہے اور نہایت عقیدت و احترام کے ساتھ یوم میلاد النبیﷺ منایا جا رہا ہے۔
