ملک میں ایسا انصاف نہ لائیں کہ لوگ آسمان کی طرف دیکھنا شروع کردیں، شیخ رشید احمد

?️ 3 ستمبر 2025

راولپنڈی: (سچ خبریں) عوامی مسلم لیگ کے سربراہ اور سابق وفاقی وزیر شیخ رشید احمد نے اپیل کی ہے انصاف کو عام کیا جائے کیوں کہ ہم چاہتے ہیں ملک میں امن و سکون ہو اور پاکستان ترقی کرے۔

راولپنڈی کی انسداد دہشتگردی عدالت کے باہر میڈیا سے گفتگو کرتے ہوئے شیخ رشید احمد خان نے کہا کہ میرا بھتیجا کبھی فیصل آباد نہیں گیا لیکن فیصل آباد میں میرے بھتیجے کو 4 کیسز میں 10،10 سال کی سزا دی گئی ہے، جرح کی بھی اجازت نہیں اور اس کیس کا کوئی گواہ بھی نہیں ہے، ہمیں کیس لڑنے کی اجازت نہیں دی جارہی، دیگر کیسز میں بھی وکیل اور گواہ سرکاری ہیں۔شیخ رشید احمد نے اپیل کی ہے انصاف کو عام کیا جائے کیوں کہ ہم چاہتے ہیں ملک میں امن و سکون ہو اور پاکستان ترقی کرے۔

سابق وفاقی وزیر شیخ رشید احمد خان کا کہنا ہے کہ انصاف رسوا ہوگیا ہے، دھجیاں ادھڑ گئیں، جن غریب ورکرز کو سزائیں دی گئی ہیں ان کے گھروں کے حالات دیکھیں، جن ورکرز کو سزائیں دی گئی ہیں ان کے گھروں میں کھانے کیلئے کچھ بھی نہیں، سکول کی فیس دینے کے پیسے نہیں ہیں، ملک میں انصاف کو عام کیا جائے اور عوام کو سہولت دی جائے کیوں کہ اسی سے پاکستان آگے جائے گا۔

شیخ رشید احمد خان نے کہا کہ ہم چاہتے ہیں ملک میں امن و سکون ہو اور پاکستان ترقی کرے، ایسا انصاف نہ لائیں کہ لوگ آسمان کی طرف دیکھنا شروع کر دیں، پہلے ہی ملک میں بھارت کی آبی جارحیت کی وجہ سے پاکستان کا کسان تباہ و برباد ہوگیا، پاکستان کے کسانوں کی حقیقی معنوں میں مدد کی جائے، کالا باغ اور دوسرے ڈیم بنانے کیلئے تو بہت کوششیں کی گئیں ہیں، میں 16 سے 17 بار وزیر رہا ہوں ہر بار ڈیم بنانے کی کوشش کی گئی لیکن سندھ کے لوگ کالا باغ ڈیم کو قبول نہیں کرتے۔