مشرق وسطیٰ میں بڑھتی کشیدگی، پاکستان کسی بھی ممکنہ اثر سے نمٹنے کیلئے مکمل طور پر تیار ہے، محمد اورنگزیب

?️ 17 جون 2025

اسلام آباد: (سچ خبریں) وفاقی وزیر خزانہ محمد اورنگزیب کا کہنا ہے کہ مشرق وسطیٰ میں بڑھتی ہوئی جیو پولیٹیکل کشیدگی کے تناظر میں پاکستان کسی بھی ممکنہ اثر سے نمٹنے کیلئے مکمل طور پر تیار ہے،اگر صورتحال مزید بگڑتی ہے تو ہم اقدامات کیلئے اچھی پوزیشن میں ہیں اور امید ہے کہ ایسا نہ ہو۔

اسلام آباد میں نیشنل ورکشاپ آن ٹرانزیشننگ ٹو ڈیفائنڈ کنٹریبیوشن پنشن سکیمزسے خطاب کرتے ہوئے وفاقی وزیر خزانہ محمد اورنگزیب نے مسلم ممالک کا مشرق وسطیٰ کو جوہری اور دیگر تباہ کن ہتھیاروں سے پاک بنانے کی فوری ضرورت پر زوردیا۔

بزنس ریکارڈر کے مطابق وزیر خزانہ نے کہا کہ حکومت نے اس سلسلے میں تمام متعلقہ فریقین کے ساتھ ایک تفصیلی اجلاس کیاجس میں اس بات کو یقینی بنایا گیا کہ ملک میں اشیائے ضروریہ کے وافر ذخائر موجود ہیں، اثاثہ جات کی تمام اقسام کی قیمتوں پر مکمل نظر ہے اور ہر ممکنہ صورتحال سے نمٹنے کیلئے ہم تیار ہیں۔

وفاقی وزیر خزانہ محمد اورنگزیب نے تقریب سے خطاب کرتے ہوئے امریکی محصولات پر جاری مذاکرات کے حوالے سے بتایا کہ ان کی امریکہ کے وزیر تجارت ہاورڈ لٹنک سے بہت تعمیری اور مثبت ملاقات ہوئی۔

انہوں نے کہا کہ دونوں ممالک اس سمت میں آگے بڑھ رہے ہیں کہ پاکستان کو امریکی ٹیرف کے تناظر میں مسابقتی بنیادوں پر ایک بہتر پوزیشن میں لایا جائے اور سب سے بڑھ کر یہ کہ پاکستان اور امریکہ کے درمیان اسٹریٹجک شراکت داری کو مزید فروغ دیا جائے۔وفاقی وزیر خزانہ محمد اورنگزیب نے اس موقع پر حکومت کی جانب سے توانائی، سرکاری اداروں (SOEs) اور ٹیکس نظام میں جاری ساختی اصلاحات کے عمل کو جاری رکھنے کے عزم کا اعادہ کیا۔

انہوں نے کہا’اس بار ہم نے ٹیرف میں بنیادی اصلاحات کی ہیں تاکہ معیشت کو مسابقتی بنایا جا سکے اور ہماری برآمدی صنعت ترقی کرے۔ گزشتہ ہفتے کے آخر میں ایران اور اسرائیل کے درمیان تازہ فضائی حملوں کے بعد خدشات بڑھ گئے ہیں کہ یہ جنگ پورے خطے میں پھیل سکتی ہے اور مشرق وسطیٰ سے تیل کی برآمدات شدید متاثر ہو سکتی ہیں۔ ان خطرات کے پیش نظر وزیراعظم شہباز شریف نے پیر کو پٹرولیم مصنوعات کی قیمتوں اور فراہمی کی نگرانی کیلئے ایک اعلیٰ سطحی کمیٹی قائم کی ہے۔