مسافروں کیلئے نیا سفری ہدایت نامہ جاری کر دیا گیا

🗓️ 30 اگست 2021

اسلام آباد (سچ خبریں) عالمی وباء کورونا کے پیش نظر پاکستان آنے والے مسافروں کے لئے ہدایت نامہ جاری کرتے ہوئے سول ایوی ایشن اتھارٹی نے کیٹگری سی ممالک سے آنے والے مسافروں پر پابندی برقرار رکھی اور کہا ان ممالک سے مسافروں کوپاکستان آمد پرخصوصی اجازت نامہ درکار ہوگا۔

تفصیلات کے مطابق سول ایوی ایشن اتھارٹی نے نیا سفری ہدایت نامہ جاری کردیا ، جس میں کیٹگری سی ممالک سے آنے والے مسافروں پر پابندی برقرار رکھی گئی ہے،  سی کیٹگری ممالک کےمسافروں کوپاکستان آمد پرخصوصی اجازت نامہ درکار ہوگا اور اس کے بغیر سرکرنا مشکل ہے۔

سی اےاے کی جانب سے نوٹیفکیشن میں کہا گیا کہ عارضی سفری پابندیوں میں 30ستمبر تک توسیع کردی گئی ہے کیٹگری سی میں بنگلادیش،ایران،عراق،نیپال،جنوبی افریقہ سمیت 15ممالک شامل ہیں۔نوٹیفکیشن کے مطابق کیٹگری اے،بی سے پاکستان آنے والے مسافروں کو 72 گھنٹے قبل ٹیسٹ کرانا ہوگا اور مسافروں کو پاکستان پہنچے پرقرنطینہ کی شرط پر بھی عمل کرنا ہوگا۔

خیال رہے کہ کورونا وائرس کے پیش نظر سفر کے دوران ایس او پیز پر عمل درآمد بھی کروایا جارہا ہے۔ایئرپورٹس اور طیاروں میں فیس ماسک کا استعمال لازمی ہے۔ مسافروں اور عملے کو بھی احتیاطی تدابیر پر ہرممکن عمل کرنے کی ہدایت کی گئی ہے۔