یمن میں سعودی عرب کی غیرقانونی جنگ کے نتیجے میں یمن کی نصف آبادی پینے کے پانی سے محروم: اقوام متحدہ

?️ 30 اگست 2021

جنیوا (سچ خبریں) اقوام متحدہ نے یمن میں سعودی اتحاد کی جانب سے غیرقانونی جنگ کے خطرناک نتائج کے بارے میں انتباہ جاری کرتے ہوئے کہا ہے کہ سعودی اتحاد کی جانب سے جاری جنگ کے نتیجے میں یمن کی نصف سے زیادہ آبادی پینے کے پانی سے محروم ہے۔

سچ خبریں نیوز ایجنسی نے المسیرہ کے حوالے سے نقل کرتے ہوئے لکھا ہے کہ اقوام متحدہ میں قائم بین الاقوامی ادارہ برائے ہجرت (آئی او ایم) کا کہنا ہے کہ یمن دنیا کے بدترین انسانی بحران سے دوچار ہے، المسیرہ کے مطابق، اس وقت، یمن میں تقریبا 15 ملین افراد پینے کے صاف پانی تک رسائی سے محروم ہیں۔

تنظیم نے اپنے ایک بیان میں کہا کہ پچھلے ایک سال کے دوران، ہم نے 20 لاکھ سے زائد یمنیوں کو پینے کے صاف پانی اور صحت کے شعبے میں خدمات فراہم کی ہیں، تاہم یمن میں انسانی صورت حال توقع سے زیادہ خراب ہے۔

اس سے قبل انسانی حقوق کے گروپوں نے رپورٹ کیا تھا کہ 80 فیصد یمنیوں کو انسانی امداد کی اشد ضرورت ہے لیکن کیونکہ سعودی عرب نے اپنی فوجی جارحیت جاری رکھی ہوئی ہے، لہٰذا یمن میں پٹرولیم مصنوعات لے جانے والے یمنی بحری جہازوں کی ضبطی کی وجہ سے ایندھن کی کمی ملک میں بہت سی اہم سہولیات اور پاور پلانٹس کی ناکامی کا باعث بنی ہیں۔

حال ہی میں یمنی آئل کمپنی نے سعودی عرب کے دشمنانہ اقدامات کے حوالے سے ایک بیان جاری کیا، کمپنی نے کہا کہ سعودی عرب اور اس کے اتحادی یمن میں سمندری چوری کررہے ہیں۔

یمنی آئل کمپنی نے اپنے بیان میں کہا ہے کہ اقوام متحدہ سعودیوں کے دشمنانہ اقدامات اور ان کی بحری قزاقی پر خاموش ہے اور انہیں نظر انداز کررہا ہے۔

یمنی آئل کمپنی کے ایک بیان میں یہ بھی کہا گیا ہے کہ سعودی جارح اتحاد نے یمنی ایندھن لے جانے والے بحری جہازوں پر قبضہ جاری رکھا ہوا ہے، بین الاقوامی برادری کے لیے ضروری ہے کہ وہ فوری طور پر ان جہازوں کے قبضے کو ختم کرنے کے لیے اقدامات کرے کیونکہ بصورت دیگر یمن میں ایک بڑا انسانی بحران پیدا ہوسکتا ہے۔

قبل ازیں، یمنی سپریم پولیٹیکل کونسل کے چیئرمین مہدی المشاط نے کہا کہ سعودی اتحادی کرائے کے فوجی یمن کے تیل اور گیس کی آمدنی کا 85 فیصد سے زیادہ لوٹ رہے ہیں جبکہ یمن کے مقبوضہ جنوبی صوبوں کے لوگ جدوجہد کر رہے ہیں۔

یمنی سپریم پولیٹیکل کونسل کے سربراہ نے یہ بھی کہا کہ امریکہ کی قیادت میں جارح ممالک یمن کے خلاف پابندیاں سخت کرکے اور تیل، خوراک اور ادویات کے بحری جہازوں کے ساتھ ساتھ معاشی جنگ جاری رکھ کر یمنیوں کی مشکلات میں اضافہ کرنا چاہتے ہیں۔