فیلڈ مارشل عاصم منیر سے ورلڈ لبرٹی فنانشل کے وفد کی اہم ملاقات، عالمی سرمایہ کاروں کے پاکستان پر بڑھتے اعتماد کا اظہار

?️ 14 جنوری 2026

راولپنڈی (سچ خبریں) فیلڈ مارشل سید عاصم منیر سے عالمی فن ٹیک کمپنی ورلڈ لبرٹی فنانشل کے وفد نے ملاقات کی۔

آئی ایس پی آر کے مطابق وفد کی قیادت کمپنی کے چیف ایگزیکٹو آفیسرز یکری وٹکوف نے کی، ملاقات پاکستان میں ابھرتی ہوئی معاشی صورتحال میں بین الاقوامی نجی سرمایہ کارگروپوں کی بڑھتی دلچسپی کی عکاس ہے۔ آئی ایس پی آرکا کہنا ہے کہ ملاقات پاکستان کی فن ٹیک صلاحیت میں عالمی اعتماد میں اضافے کا واضح اشارہ ہے، اس موقع پر کراس بارڈر ڈیجیٹل فنانس، جدید مالیاتی نظام اورمالی شمولیت کے فروغ پر تفصیلی گفتگو کی گئی۔

زیکری وٹکوف نے پاکستان میں موجود بے پناہ اقتصادی امکانات پر روشنی ڈالتے ہوئے کہا کہ ملک ڈیجیٹل فنانس اور ٹیکنالوجی کے شعبے میں تیزی سے آگے بڑھ رہا ہے۔ انہوں نے مستقبل کی ٹیکنالوجیز کو اپنانے کے لئے پاکستانی قیادت کی کوششوں کو سراہا اور سرمایہ کاری کے وسیع مواقع میں دلچسپی کا اظہار کیا۔

فیلڈ مارشل سید عاصم منیرنے کہا کہ پاکستان معاشی استحکام، سرمایہ کاروں کے اعتماد اور قومی ترقی کو مستحکم بنانے کے لئے پرعزم ہے۔ انہوں نے اس عزم کا اعادہ کیا کہ حکومت اور ادارے جدید ٹیکنالوجی اور عالمی شراکت داری کے ذریعے معیشت کو مضبوط بنانے کے لئے بھرپور اقدامات جاری رکھیں گے۔