فردوس عاشق نے مودی کو (ن) لیگ کے سرکا تاج قرار دے دیا

?️ 9 جولائی 2021

لاہور(سچ خبریں) وزیراعلیٰ پنجاب کی معاون خصوصی فردوس عاشق اعوان نے بھارتی وزیر اعظم مودی کو (ن) لیگ کے سر کا تاج قرار دیتے ہوئے کہا ہے کہ  کشمیریوں پر ظلم کے پہاڑ ڈھانے والا مودی (ن) لیگ کے سرکا تاج ہے مودی اور شریف خاندان کی ملک دشمنی ڈھکی چھپی نہیں۔

آزاد کشمیر میں مریم نواز کے خطاب پر ردعمل دیتے ہوئے فردوس عاشق اعوان نے کہا کہ مودی اور شریف خاندان کی ملک دشمنی ڈھکی چھپی نہیں۔انہوں نےکہا کہ نوازشریف نے مودی اور جندال سے مل کرکشمیریوں کے زخموں پر نمک چھڑکا جب کہ مودی کے یار نے کشمیریوں کی پیٹھ میں چھراگھونپا، کشمیریوں پر ظلم کے پہاڑ ڈھانے والا مودی (ن) لیگ کے سرکا تاج ہے۔

خیال رہے کہ گزشتہ روز مظفر آباد میں انتخابی جلسے سے خطاب کرتے ہوئے مریم نواز نے وزیراعظم عمران خان کو شدید تنقید کا نشانہ بنایا تھا۔مریم نواز کا کہنا تھا کہ عمران خان نےکشمیرکے لیے 2 منٹ کی خاموشی اختیار کرنےکا کہا تھا اور آج تک خاموشی اختیار کیے بیٹھے ہیں۔

انہوں نے کہاکہ 30 سال اقتدار کے مزے لوٹنے والوں نے کشمیر کے لیے کچھ نہ کیا جبکہ وزیراعظم عمران خان نے دنیا بھر میں کشمیر کا مقدمہ انتہائی جارحانہ اور موثر انداز میں لڑا ہے۔فردوس عاشق اعوان کا کہنا تھا کہ وزیراعظم عمران خان کی مدبرانہ حکمت عملی سے آزادی کی تحریک میں نئی جان آئی، بھگوڑے ظل سبحانی کو کشمیریوں کا مسیحا کہنا کشمیریوں کے ساتھ زیادتی ہے۔