صدر مملکت عارف علوی کی قومی ٹیم کو مبارک باد

?️ 25 اکتوبر 2021

اسلام آباد(سچ خبریں) پاکستان نے بھارت کے خلاف کرکٹ میچ میں تاریخی کامیابی حاصل کی ہے جس پر صدر مملکت عارف علوی نے قومی کرکٹ ٹیم کو مبارک باد پیش کی ہے۔قومی ٹیم نے یہ میچ نہایت آسانی سے بھارت سے جیت لیا اور پوری قوم کے دلوں کو خوش کیا اور پوری قوم کی دعائیں ٹیم کے ساتھ تھیں۔

اپنے بیان میں صدر عارف علوی نے کہا کہ شاباش گرین شرٹس، ہمیں آپ پر فخر ہے۔دوسری جانب وزیراعظم عمران خان نے سعودی عرب میں ٹی وی اسکرین پر میچ دیکھا اور پاکستان کی فتح پر ٹیم کو مبارک باد دی۔وزیراعظم کے ساتھ وزیر خارجہ شاہ محمود قریشی، شوکت ترین، حماد اظہر اور دیگر نے بھی پاک بھارت میچ دیکھا۔

آرمی چیف جنرل قمر جاوید باجوہ نے بھی بھارت کے خلاف شاندار فتح پر پاکستان کرکٹ ٹیم کو مبارکباد پیش کی ہے۔آئی ایس پی آر کے مطابق آرمی چیف نے کہا کہ پاکستانی کرکٹ ٹیم نے ہم سب کا سر فخر سے بلند کر دیا ہے اور یہ سبھی کے لئے فخر کی بات ہے۔

واضح رہے کہ ٹی ٹوئنٹی ورلڈکپ کے پہلے میچ میں پاکستان نے بھارت کو 10 وکٹوں سے شکست دیکر تاریخی فتح حاصل کی ہے جس کے بعد پوری ملک میں مختلف انداز میں خوشیاں منائی جا رہی ہیں اور لوگوں کے دلوں میں جوش و خروش پایا جا رہا ہے۔