سہیل آفریدی نے بانی پی ٹی آئی کو خوش کرنے کیلئے سیاسی بیان دیا۔ مصدق ملک

?️ 13 اکتوبر 2025

اسلام آباد (سچ خبریں) وفاقی وزیر موسمیاتی تبدیلی مصدق ملک نے کہا ہے کہ سہیل آفریدی نے بانی پی ٹی آئی کو خوش کرنے کیلئے سیاسی بیان دیا ہے، ہو سکتا ہے سہیل آفریدی حکمت سے کام لیں گے۔

وفاقی وزیر مصدق ملک نے کہا کہ سانحہ اے پی ایس میں سیکڑوں بچوں کو شہید کر دیا گیا۔ انہوں نے کہا کہ ہم روزانہ اپنے بچوں کی لاشوں کو اٹھا رہے ہیں، خیبرپختونخوا حکومت کہتی ہے آپریشن نہیں ہونے دیں گے۔

مصدق ملک کا کہنا تھا کہ اگر آپریشن نہیں ہونے دینا تو پھر دہشت گردوں سے کیسے نمٹیں گے، بانی پی ٹی آئی کی آج بھی وہی سوچ ہے۔ وفاقی وزیر موسمیاتی تبدیلی کا کہنا تھا کہ ہماری سرحدوں پر حملہ ہو چکا ہے، ایک ملک نے حملہ کر دیا اور یہ کہہ رہے ہیں آپریشن نہیں ہونے دیں گے۔

مصدق ملک نے کہا کہ اگر آپریشن نہیں ہونے دیں گے تو کیا بانی طالبان کے ساتھ کھڑے ہیں؟ جب کوئی لیڈر ہمارے بچوں کو شہید کرنے والوں کے ساتھ کھڑا ہو جائے تو پھر کیا کہیں گے؟۔