سکیورٹی فورسز نے مختلف کارروائیوں میں 18 خوارجی جہنم واصل کردیئے

?️ 17 اکتوبر 2025

لکی مروت (سچ خبریں) سکیورٹی فورسز نے مختلف کارروائیوں میں 18 خوارجی جہنم واصل کر دیئے۔

پہلی کارروائی میں شمالی وزیرستان میں سکیورٹی فورسز نے انٹیلی جنس معلومات پر آپریشن کرتے ہوئے 6 خوارج جہنم واصل کر دیئے جبکہ خودکش حملہ ناکام بناتے ہوئے 4 خوارج ہلاک کر دیئے۔ سکیورٹی ذرائع نے بتایا کہ شمالی وزیرستان کے علاقے دتہ خیل میں سکیورٹی فورسز نے انٹیلی جنس اطلاعات پر مبنی آپریشن کیا، مضافاتی علاقوں میں دہشتگردوں کی نقل و حرکت کی خفیہ اطلاعات موصول ہوئی تھیں۔

سکیورٹی فورسز نے اطلاعات کے پیش نظر 8 سے 10 روز تک علاقے کی بھرپور نگرانی کی، پھر سکیورٹی فورسز نے ان دہشت گردوں کو گھیرے میں لے لیا، فائرنگ کے تبادلے میں بھارتی حمایت یافتہ 6 دہشت گرد ہلاک اور 3 زخمی ہو گئے۔ سکیورٹی ذرائع نے بتایا کہ ہلاک ہونے والے دہشت گردوں میں فتنہ الخوارج کا کمانڈر محبوب عرف محمد بھی شامل ہے، سکیورٹی فورسز کی یہ کارروائی علاقے میں امن دشمن عناصر کے خلاف جاری آپریشن کا حصہ ہے۔

دوسری طرف سکیورٹی فورسز نے میر علی، شمالی وزیرستان میں خودکش حملہ ناکام بناتے ہوئے 6 خوارجی جہنم واصل کر دیئے، جہاں ایک خارجی نے بارود سے بھری گاڑی سکیورٹی فورسز کے کیمپ کی دیوار سے ٹکرا دی۔ سکیورٹی ذرائع کے مطابق دیوار سے ٹکرانے کے بعد گاڑی پھٹ گئی، 5 مزید خوارجیوں نے کیمپ کے اندر داخل ہونے کی کوشش کی، سکیورٹی فورسز کی بروقت کارروائی سے پانچوں خارجی کیمپ کے باہر ہی جہنم واصل ہوئے۔

پوسٹ کی چھت گرنے سے سکیورٹی فورسز کا ایک جوان شہید جبکہ 6 جوانوں کے زخمی ہونے کی اطلاعات ہیں۔ نیشنل ایکشن پلان کے تحت، آخری خارجی کے خاتمے تک سکیورٹی ادارے، عوام، افواجِ پاکستان ملک کے دفاع کے لیے ڈٹی رہیں گی۔ ایک اور کارروائی میں سکیورٹی فورسز نے 16 اکتوبر 2025 کو لکی مروت کے علاقے سلطان خیل میں پاک فوج نے انٹیلی جنس اطلاعات کی بنیاد پر کامیاب کارروائی کرتے ہوئے 8 انتہائی مطلوب خوارجین کو جہنم واصل کر دیاؕ

سکیورٹی ذرائع نے بتایا کہ علاقے میں افغان طالبان کی پراکسی خوارج کی موجودگی کی اطلاع پر کارروائی عمل میں لائی گئی۔ ذرائع کے مطابق فورسز نے سلطان خیل اور طوفان والا کے علاقوں میں فضائی اور زمینی نگرانی شروع کی، نگرانی کے دوران خوارج کی نقل و حرکت کی نشاندہی ہونے پر فوری کارروائی کی گئی۔

سکیورٹی ذرائع کے مطابق آپریشن کے دوران دہشت گردوں کے قبضے سے بھاری مقدار میں اسلحہ اور بارود بھی برآمد ہوا۔