حکومت کی اولین ترجیح عوام کو معاشی طور پر خود کفیل بنانا ہے: وزیر اعظم

?️ 10 جون 2021

اسلام آباد( سچ خبریں)وزیرِ اعظم عمران خان کا کہنا ہے کہ حکومت کی اولین ترجیح عوام کو معاشی طور پر خود کفیل بنانا ہے، حکومت نے معاشی طور پر کمزور طبقے کو غربت سے نکالنے کے لیے جامع حکمت عملی مرتب کرلی ہے۔عام آدمی کی قوت خرید کو بہتر بنانے کے لئے کوشاں ہیں۔

ذرائع کے مطابق ‘کامیاب پاکستان پروگرام’ کے اعلیٰ سطح کے اجلاس کی صدارت کرتے ہوئے انہوں نے بھارت اور چین کی مثال دی اور کہا کہ چین نے پچھلے 30 سالوں میں لاکھوں لوگوں کو ایسے اقدامات کے تحت غربت سے نکالا جبکہ بھارت اس میں ناکام رہا۔

وزیر اعظم کا کہنا تھا کہ ‘معاشرے کے غریب طبقات کو مالی اعانت فراہم کرنے کے علاوہ حکومت کی اولین ترجیح عوام کو معاشی طور پر خود کفیل بنانا ہے’۔عمران کے ایک مشیر نے میڈیا کو بتایا کہ ‘حکومت مہنگائی کو ختم نہیں کر سکتی، تاہم یہ عام آدمی کی قوت خرید کو بہتر بنانے کے لیے اقدامات کر رہی ہے’۔

انہوں نے کہا کہ ‘ہم قیمتوں کو ان کے پچھلے مقام پر نہیں لاسکتے لیکن ہم لوگوں کی قوت خرید کو بہتر بنا سکتے ہیں تاکہ مہنگائی ان پر اثر انداز نہ ہو’۔وزیر اعظم نے کہا کہ حکومت نے لوگوں کی قوت خرید کو بہتر بنانے کے لیے متعدد اقدامات اٹھائے ہیں کیونکہ کسانوں اور زراعت کے شعبے کو سبسڈی کی شکل میں 11 کھرب روپے دیے گئے ہیں جس سے ملک کی 70 فیصد آبادی، جو دیہی علاقوں میں رہتی ہے، کو فائدہ ہو رہا ہے۔

اجلاس میں وفاقی وزیرِ خزانہ شوکت ترین، معاونین خصوصی وقار مسعود، عثمان ڈار، چیئرمین نیا پاکستان ہاؤسنگ اتھارٹی لیفٹیننٹ جنرل (ر) انور علی حیدر، چیئرمین حبیب بینک سلطان علی الانہ، صدر پنجاب بینک ظفر مسعود، متعلقہ اعلیٰ حکام اور اسٹیک ہولڈرز نے شرکت کی۔اجلاس کو کامیاب پاکستان پروگرام کے تحت کامیاب کاروبار، کامیاب کسان اور کامیاب ہنرمند پروگرام اور کامیاب پاکستان ہاؤسنگ کے تحت کم لاگت رہائشی اسکیموں پر بریفنگ دی گئی۔

وزیر اعظم کی ہدایت پر حکومت نوجوانوں سے متعلق تمام پروگرامز کو ‘کامیاب پاکستان پروگرام’ کی چھت تلے لے آئی ہے۔اجلاس کو بتایا گیا کہ کامیاب پاکستان پروگرام ملک میں معاشی سرگرمیوں کو بڑھانے اور لوگوں کو روزگار کے لیے خود کفیل کرنے میں اہم کردار ادا کرے گا۔