جہانگیرترین کیخلاف کیس قانون کے مطابق چلے گا: شہزاد اکبر

?️ 2 اپریل 2021

اسلام آباد(سچ خبریں) وزیراعظم کے مشیر برائے داخلہ و احتساب شہزاد اکبر نے کہاہے کہ قانون سب کے لئے برابر ہوتا ہے ،قانون کے سامنے کوئی پسندیدہ نہیں،جہانگیر ترین کے خلاف کیس قانون کے مطابق چلے گا اور ان کے خلاف قانون کے مطابق کاروائی کی جائے گی۔

تفصیلات کے مطابق اسلام آباد میں پریس کانفرنس کرتے ہوئے ان کا کہنا تھاکہ جہانگیر ترین کے خلاف کیس قانون کے مطابق چلے گا اور ان کے خلاف قانون کے مطابق کاروائی کی جائے گی۔وہ مہنگی چینی کے ذمے دار ناجائز منافع خور ہیں، منی لانڈرنگ اور سٹہ مافیا چینی مہنگی کرنے میں ملوث ہیں۔

ان کا کہنا تھا کہ  اپریل میں چینی کے نرخ ابھی سے طے کرائے جارہے تھے، سٹے بازوں سے حاصل معلومات میں کئی نام سامنے آئے، لاہور اور کراچی میں ایف آئی اے نے سٹے بازوں کے خلاف کارروائی کی،عدالت نے ہمیں کارروائی کرنے کی اجازت دی ہے۔

مشیر داخلہ نے کہا کہ ہم سب ان آٹھ دس لوگوں کے ہاتھوں یرغمال ہیں جن کے خلاف کارروائی ضروری ہے، سبسڈی لینا ہو تو ایکس مل پرائس راتوں رات طے کرلی جاتی ہے، عوام کو چینی کتنے کی بیچنی ہے اس کی راہ میں رکاوٹ کی جاتی ہے۔

شہزاد اکبرنے رمضان المبارک کے حوالے سے گفتگو کرتے ہوئے  کہا کہ اطلاعات ہیں  سٹہ مافیا رمضان میں چینی کے دام بہت زیادہ کرنے جا رہے تھے، رمضان کے لیے چینی کی فروری، مارچ کی قیمت سے 20 سے 25 فیصداضافہ کیا جارہا تھا لیکن حکومت کوشش کررہی ہے رمضان میں قیمتوں کو قابو میں رکھاجاسکے اس کے لیے وفاق اور صوبوں کا ہم آہنگی سے کام کرناضروری ہے۔