افغان طالبان رجیم کا جھوٹا پروپیگنڈا ایک بار پھر بے نقاب

?️ 14 مارچ 2026

اسلام آباد (سچ خبریں) افغان طالبان رجیم کا جھوٹا پروپیگنڈا ایک بار پھر بے نقاب ہو گیا ہے، پاکستان نے نام نہاد افغان وزارت دفاع کے بے بنیاد اور من گھڑت دعوے مسترد کر دیئے ۔

وفاقی وزارت اطلاعات کا کہنا تھا افغان طالبان رجیم کے پاکستانی فوجی چوکی پر قبضے اور نقصان پہنچانے کے دعوے جھوٹ کا پلندہ ہیں۔ ایسے من گھڑت دعوے افغان عوام کو گمراہ کرنے کی کوشش ہیں جو طالبان رجیم کا ظلم و ستم سہہ رہے ہیں۔ افغانستان کے اندر دہشت گردوں اور ان کے سہولت کاروں کے خلاف ٹارگٹڈ آپریشنز جاری ہیں۔

ان کا مزید کہنا تھا کہ افغان طالبان اور فتنہ الخوارج کو پہنچنے والے نقصانات کی تفصیلات مسلسل جاری کی جا رہی ہیں۔ پاکستان کی دہشت گرد گروپوں کے خلاف کارروائیوں کے ویڈیو اور تصویری شواہد میڈیا کے ساتھ شیئر کئے جا رہے ہیں۔

دوسری جانب طالبان کے من گھڑت دعوؤں کا کوئی قابل تصدیق ثبوت موجود نہیں۔ بھارتی میڈیا اور سوشل میڈیا نیٹ ورکس پروپیگنڈا بڑھا رہے ہیں۔ حقائق کی جانچ کے بعد افغان طالبان رجیم کے دعوے بار بار غلط ثابت ہوئے۔