اسحاق ڈار سے معیشت نہیں سنبھل رہی، توقعات پوری کرنے میں ناکام رہے

?️ 15 دسمبر 2022

لاہور: (سچ خبریں) سینئر تجزیہ کاروں کا کہنا ہے کہ وزیر خزانہ اسحاق ڈار توقعات پوری کرنے میں ناکام رہے۔جنگ اخبار کی رپورٹ کے مطابق سینئر تجزیہ کار سہیل وڑائچ، محمل سرفراز اور شہزاد اقبال نے کہا کہ مفتاح اسماعیل درست کہہ رہے آئی ایم ایف نے ساتھ نہ دیا تو پاکستان کے ڈیفالٹ کے خطرات بہت زیادہ بڑھ جائیں گے۔اسحاق ڈار سے معیشت نہیں سنبھل رہی ہے ، ان سے وابستہ توقعات پوری نہیں ہو رہی ہیں۔

عمران خان نے اسمبلیاں توڑیں تو اتنی بڑی تعداد میں ضمنی الیکشن ممکن نہیں ، حکومت کو عام انتخابات کی طرف ہی جانا پڑے گا۔شہزاد اقبال نے کہا کہ اسحاق ڈار کے پاس پتہ نہیں کون  سے اعداد و شمار ہیں جس کی بنا پر وہ معیشت کی سمت درست قرار دے رہے ہیں۔آئی ایم ایف پاکستان کو کوئی رعایت دینے کے موڈ میں نہیں۔

ہمیں تمام شرائط ماننا پڑیں گی۔اسحاق ڈار اور مفتاح اسمایل کے درمیان حکومت آنے کے بعد سے ٹھنی ہوئی ہے۔

مفتاح اسماعیل وزیر خزانہ بنے تو اسحاق ڈار ان کی پالیسیوں پر مسلسل تنقید کرتے رہے۔خیال رہے کہ سابق وزیر خزانہ مفتاح اسماعیل پاکستان کے ڈیفالٹ کا خدشہ ظاہر کر چکے ہیں۔ مفتاح اسماعیل نے چیئرمین پی ٹی آئی عمران خان کو بابائے ڈیفالٹ قرار دے دیا۔ نجی ٹی وی کے پروگرام میں گفتگو کرتے ہوئے مفتاح اسماعیل کا کہنا تھا کہ عمران خان نے اصل میں پاکستان کو ڈیفالٹ کی طرف دکھیلا، معیشت تباہ کرنے والے عمران خان اقتدار کی خاطر آج بھی چاہتے ہیں کہ ملک ڈیفالٹ کرجائے۔

مفتاح اسماعیل کا کہنا تھا کہ جب میں وزیرخزانہ تھا تو مشکل فیصلےکیے، جب بھی اقدامات کیے وزیراعظم کی مرضی سے کیے۔ سابق وفاقی وزیر خزانہ کا کہنا تھا کہ میں اوپن مارکیٹ پریقین رکھتا ہوں لیکن اسحاق ڈار یقین نہیں رکھتے۔ان کا کہنا تھا کہ جب دنیا میں کوئی قرض نہیں دیتا تو آئی ایم ایف قرض دیتا ہے، اس وقت ملک کو ڈیفالٹ ہونے سے بچائیں، لاکھ دکاندار ہیں صرف 30 ہزار دکاندار ٹیکس دیتے ہیں، ہم کیا دکانداروں سے دو سے تین ہزار ٹیکس نہیں لے سکتے؟ سابق وفاقی وزیر خزانہ اور مسلم لیگ ن کے رہنما مفتاح اسماعیل نے کہا ہے کہ آئی ایم ایف پروگرام کی واپسی تک ڈیفالٹ کا خطرہ رہے گا۔