صیہونی غزہ میں غیر انسانی اور نسل کشی کی پالیسی اختیار کیے ہوئے ہیں:عالمی ڈاکٹرز

سچ خبریں:ڈاکٹروں کی عالمی تنظیم نے غزہ میں صیہونیوں کے رویے کو نسل کشی کی کوشش قرار دیتے ہوئے کہا ہے کہ صیہونی حکومت انسانی امداد کو جبری نقل مکانی کے لیے ہتھیار کے طور پر استعمال کر رہی ہے۔

انسانی امدادی تنظیم (Doctors Without Borders) نے اپنی ایک تازہ رپورٹ میں اسرائیل پر الزام عائد کیا ہے کہ وہ غزہ میں غیر انسانی طرز عمل اختیار کیے ہوئے ہے، اور اس طرز عمل کو تنظیم نے نسل کشی کے دائرے میں شمار کیا ہے۔

یہ بھی پڑھیں:300 برطانوی شخصیات نے غزہ کی نسل کشی میں ملوث ہونے کے خاتمے کا مطالبہ کیا

لبنانی چینل المیادین کے مطابق، Doctors Without Bordersنے اپنے بیان میں اس بات پر زور دیا ہے کہ اسرائیل گزشتہ 19 ماہ سے فلسطینیوں کے خلاف مسلسل غیر انسانی اقدامات کر رہا ہے، بالخصوص ان فلسطینیوں کے خلاف جو انسانی امداد کے منتظر ہیں۔

بیان میں مزید کہا گیا ہے کہ امریکہ اور اسرائیل کے تحت بنائی گئی خوراک کی تقسیم کی موجودہ اسکیم ایک ناکام منصوبہ ہے، جس کی ابتداء ہی تباہ کن اور غیر مؤثر طریقے سے ہوئی۔

رپورٹ میں یہ بھی واضح کیا گیا ہے کہ صیہونی حکومت نے امدادی سامان کی تقسیم کے لیے ایک خطرناک طریقہ اختیار کیا ہے، امداد کو دانستہ ان علاقوں میں منتقل کیا جا رہا ہے جہاں غیر مسلح شہریوں کو زبردستی جمع کیا جا سکے، جس سے مزید انسانی جانوں کو خطرہ لاحق ہو رہا ہے۔

مزید پڑھیں:غزہ میں نسل کشی 600 دن تک پہنچ چکی ہے۔ یہ اب 6 دن کی جنگ نہیں رہی

تنظیم کے مطابق، صیہونی انسانی امداد کو ایک سیاسی ہتھیار کے طور پر استعمال کر رہے ہیں تاکہ غزہ کے رہائشیوں کو جبراً ہجرت پر مجبور کیا جا سکے،یہ حکمت عملی صیہونی منصوبے کا حصہ لگتی ہے جس کا مقصد غزہ کی آبادی کو نسلی صفایا کی پالیسی کے تحت نکال باہر کرنا ہے۔