یمن کی بندرگاہ راس عیسی پر امریکی حملہ؛ 74 شہید، 171 زخمی

سچ خبریں:امریکہ کے جنگی طیاروں کی جانب سے یمن کے مغربی ساحلی علاقے راس عیسی میں واقع بندگاہ پر کیے گئے ہولناک حملے کے نتیجے میں کم از کم 74 افراد شہید اور 171 سے زائد زخمی ہو گئے ہیں۔ 

یمنی طبی ذرائع کی رپورٹ کے مطابق شہداء اور زخمیوں میں زیادہ تر بندرگاہ کے عام کارکن اور امدادی اہلکار شامل ہیں، زخمیوں میں سے کئی کی حالت تشویشناک ہے، جس سے اموات میں اضافے کا خدشہ ہے۔

یہ بھی پڑھیں:یمن پر حملے کے بارے میں ٹرمپ کا پیغام

مقامی ذرائع کا کہنا ہے کہ پہلا فضائی حملہ ہونے کے بعد جب امدادی کارکن اور فائر بریگیڈ کے اہلکار زخمیوں کی مدد کر رہے تھے، اسی دوران امریکی طیاروں نے دوسرا حملہ کر کے ایک اور انسانیت سوز المیہ رقم کیا۔

عینی شاہدین اور ذرائع ابلاغ کی طرف سے جاری کی گئی تصاویر میں جلتے ہوئے جسم، خون آلود لاشیں اور ملبے میں دبے زخمی صاف دیکھے جا سکتے ہیں، جنہوں نے اس حملے کے دردناک پہلو کو اجاگر کیا ہے۔

فلسطینی مزاحمتی تحریک حماس نے امریکی حملے کو واضح جنگی جرم قرار دیتے ہوئے کہا کہ یہ اقدام نہ صرف یمن کی قومی خودمختاری کی سنگین خلاف ورزی ہے بلکہ امریکہ اور صہیونی ریاست کے مظالم کی ایک کڑی ہے۔

حماس نے عالمی خوراک پروگرام (WFP) کی جانب سے متاثرہ علاقوں میں امدادی سرگرمیاں روکنے پر بھی تنقید کرتے ہوئے کہا کہ یہ اقدام یمنی عوام کی مشکلات میں مزید اضافے کا سبب بنے گا۔

اس فلسطینی مزاحمتی تنظیم نے حملے کو چند جہتی جنگی جرم قرار دیا اور کہا کہ یہ کارروائی بھی غزہ میں جاری صہیونی قتل عام سے الگ نہیں۔ ان کے بقول، امدادی آپریشن کے دوران دوبارہ حملہ کرنا، جنگی اخلاقیات کی کھلی خلاف ورزی ہے۔

فلسطینی اسلامی جہاد نے بھی اس حملے کو وحشیانہ اور انسانیت سوز قرار دیا اور کہا کہ یہ امریکہ کی اس نسل کشی کی حمایت ہے جو فلسطینی عوام کے خلاف جاری ہے۔

یہ تنظیم اس حملے کو فلسطین کے خلاف جاری صہیونی مظالم کا تسلسل قرار دیتے ہوئے کہا کہ یمن کی مزاحمت اور عوامی ارادہ کو امریکہ یا اس کے اتحادی کبھی شکست نہیں دے سکتے۔

فلسطینی مزاحمتی کمیٹیوں نے کہا کہ یمن اسلامی دنیا کا دھڑکتا دل ہے، اور امریکہ کی خونریز پالیسیاں اسے جھکا نہیں سکتیں،ان کا کہنا تھا کہ درود ہو یمنی عوام اور ان کی قیادت پر، جو ظالموں کے خلاف ڈٹ کر کھڑے ہیں۔

ایران کی وزارت خارجہ کے ترجمان اسماعیل بقائی نے امریکی حملے کو اقوام متحدہ کے منشور اور بین الاقوامی قوانین کی سنگین خلاف ورزی قرار دیتے ہوئے کہا کہ یہ حملے امریکہ کو اسرائیل کے ساتھ فلسطینیوں کے خلاف ہونے والے جرائم میں شریک بناتے ہیں۔

انہوں نے خبردار کیا کہ یمن پر امریکی حملے نہ صرف خطے کی سیکیورٹی کو خطرے میں ڈال رہے ہیں بلکہ اسرائیل کو مزید جارحیت پر اکسا رہے ہیں،ایرانی وزارت خارجہ نے اسلامی ممالک اور او آئی سی سے مطالبہ کیا کہ وہ اس کھلی جارحیت کے خلاف آواز بلند کریں اور عملی اقدامات کریں۔

دوسری جانب یمن کے شمالی علاقے صعدہ میں ہزاروں افراد سڑکوں پر نکل آئے اور فلسطینی عوام کی حمایت میں عظیم الشان مظاہرے کیے، مظاہرین نے غزہ اور یمن کے خلاف جارحیت کی شدید مذمت کی اور امریکہ و اسرائیل کے خلاف نعرے بازی کی۔

مزید پڑھیں:یمن پر امریکی حملے کے دوران ٹرمپ کا متکبرانہ انداز

یہ حملہ نہ صرف انسانی حقوق کی کھلی خلاف ورزی ہے بلکہ خطے میں امریکی اور صہیونی عزائم کا واضح مظہر ہے، بین الاقوامی برادری کی خاموشی اس ظلم کی ایک اور شکل ہے، جسے اب توڑا جانا چاہیے۔