ایران کے خلاف ٹرمپ کی جنگ غیر منصوبہ بند اور تباہ کن: امریکی سنیٹر

?️ 25 مارچ 2026

سچ خبریں:امریکی سنیٹر نے ایران کے خلاف جنگ کو غیر منصوبہ بند اور تباہ کن قرار دیا ہے۔

امریکی سنیٹر کریس مورفی نے ٹرمپ کی ایران کے خلاف جنگ کو بغیر حکمت عملی اور تباہ کن قرار دیتے ہوئے کہا کہ بحران کے حل کے لیے کوئی واضح منصوبہ موجود نہیں۔

خبر رساں ادارے سما کی رپورٹ کے مطابق امریکی ڈیموکریٹ سنیٹر کریس مورفی نے کہا ہے کہ صدر ڈونلڈ ٹرمپ کی جانب سے ایران کے خلاف شروع کی گئی جنگ ایک تباہ کن اقدام ہے جو بغیر کسی واضح منصوبہ بندی کے شروع کی گئی اور اب تک اس کے لیے کوئی جامع حکمت عملی موجود نہیں۔

انہوں نے کہا کہ یہ جنگ گزشتہ چار ہفتوں سے جاری ہے جبکہ آبنائے ہرمز بدستور بند ہے، جو اس بحران کی شدت کو ظاہر کرتا ہے۔

کریس مورفی، جو ٹرمپ کی پالیسیوں کے سخت ناقد سمجھے جاتے ہیں، نے مزید کہا کہ موجودہ صورتحال مکمل طور پر قابلِ پیش گوئی تھی، اس کے باوجود امریکی صدر نے نہ صرف بغیر منصوبہ بندی کے جنگ شروع کی بلکہ اب بھی اس بحران کو سنبھالنے کے لیے کوئی واضح لائحہ عمل پیش نہیں کیا۔

انہوں نے اس بات پر بھی زور دیا کہ جنگ جیسے بڑے فیصلے کے لیے آئینی طریقہ کار کو نظر انداز نہیں کیا جانا چاہیے۔

یاد رہے کہ کریس مورفی اس سے قبل امریکی سینیٹ میں ایک قرارداد پیش کر چکے ہیں جس میں مطالبہ کیا گیا تھا کہ ایران کے خلاف کسی بھی فوجی کارروائی سے قبل کانگریس کی منظوری حاصل کی جائے۔

اگرچہ یہ قرارداد سینیٹ میں منظور نہ ہو سکی، تاہم اس کا مقصد امریکہ کو اسرائیل کے ساتھ کسی بھی مشترکہ جنگ میں کانگریس کی پیشگی منظوری کے بغیر شامل ہونے سے روکنا تھا۔