صیہونی خفیہ تنظیم کی یحییٰ السنوار کے قتل کی منصوبہ بندی

?️ 15 ستمبر 2024

سچ خبریں: شاباک نے یحییٰ السنوار کے قتل کی منصوبہ بندی کو اپنی ترجیحات میں شامل کر لیا ہے۔

اسرائیلی چینل 12 نے انکشاف کیا ہے کہ اسرائیلی داخلی سکیورٹی سروس (شاباک) نے حماس کی سیاسی شاخ کے سربراہ یحییٰ السنوار کو قتل کرنے کے لیے ایک خصوصی انٹیلیجنس یونٹ قائم کیا ہے اور اس منصوبے کے لیے خطیر مالی وسائل مختص کیے ہیں۔

یہ بھی پڑھیں: یحییٰ السنوارصیہونیوں کو کتنا جانتے ہیں؟ صہیونی تجزیہ کار کی زبانی

شاباک نے غزہ جنگ کے آغاز سے ہی السنوار کی نقل و حرکت پر نظر رکھنے کے لیے یہ یونٹ تشکیل دیا ہے جو چوبیس گھنٹے مسلسل نگرانی کر رہا ہے۔

رپورٹ میں مزید بتایا گیا ہے کہ شاباک نے السنوار کا پیچھا کرنے اور ان کی گرفتاری یا قتل کی کوششوں کے لیے بے تحاشا مالی وسائل خرچ کیے ہیں۔

صہیونی حکام کے مطابق السنوار ہر بار اسرائیلیوں کے پہنچنے سے پہلے فرار ہونے میں کامیاب رہے ہیں۔

اسی حوالے سے فلسطینی اطلاع رسانی مرکز نے عبری ذرائع کے حوالے سے بتایا کہ اسرائیلی فوج کے جنرل دان گولدووس نے اپنے ایک سابقہ بیان میں کہا تھا کہ ہم السنوار کے قریب پہنچ گئے تھے۔

انہوں نے کہا کہ ہم ایک زیر زمین سرنگ میں داخل ہوئے جہاں ہمیں بڑی مقدار میں پیسے اور اسلحہ ملا اور وہاں کی کافی ابھی تک گرم تھی۔

مزید پڑھیں: ممتاز امریکی اور برطانوی میڈیا کا غزہ جنگ کے بارے میں اعتراف

مزید یہ بھی دعویٰ کیا گیا ہے کہ یحییٰ سنوار کافی عرصے سے موبائل فون یا الیکٹرانک مواصلاتی ذرائع استعمال نہیں کر رہے، بلکہ حماس کی عسکری کارروائیوں کے انتظام کے لیے متعدد خبر رسان نیٹ ورکس کا استعمال کر رہے ہیں۔