امریکی ریاست جارجیا میں فائرنگ کے متعدد واقعات، 6 خواتین سمیت متعدد افراد ہلاک ہوگئے

?️ 17 مارچ 2021

جارجیا (سچ خبریں)  امریکی ریاست جارجیا میں فائرنگ کے تین متعدد واقعات پیش آئے ہیں جن کے نتیجے میں 6 خواتین سمیت متعدد افراد ہلاک ہوگئے ہیں۔

تفصیلات کے مطابق امریکی ریاست جارجیا میں فائرنگ کے تین واقعات میں آٹھ افراد ہلاک ہو گئے، ہلاک ہونے والوں میں 6 ایشیائی خواتین بھی شامل ہیں۔

موصولہ اطلاعات کے مطابق اٹلانٹا اور اس سے تقریباً چالیس کلومیٹر دور شیروکی کاؤنٹی میں منگل کے روز ایک حملہ آور نے مساج پارلروں پر فائرنگ کر کے کم ازکم آٹھ لوگوں کو ہلاک کر دیا، مرنے والوں میں میں چھ ایشیائی خواتین شامل ہیں، پولیس نے مشتبہ حملہ آور کو گرفتار کرنے کا دعوی کیا ہے۔

پولیس چیف راڈنی برائنٹ نے بتایا کہ اٹلانٹا میں فائرنگ کا یہ واقعہ سڑک کے دونوں طرف واقع دو مساج پارلروں میں پیش آیا، وہاں چار افراد ہلاک ہو گئے جب کہ ایک شخص زخمی ہوا ہے۔

انہوں نے بتایا کہ پولیس کو شام چھ بجے فون پر ایک جگہ ڈاکہ زنی کی اطلاع ملی، جب پولیس موقع پر پہنچی تو وہاں تین عورتوں کو مردہ پایا۔

پولیس چیف نے بتایا کہ پولیس اس واقعہ کی ابتدائی تفتیش کر ہی رہی تھی کہ اسے سڑک کے دوسری طرف واقع ایک سپا سے فون کال موصول ہوئی، جہاں گولی لگنے سے ایک عورت کی موت ہوگئی تھی اور ایک دیگر زخمی ہو گئی تھی۔

پولیس نے واقعے کے قریب سے21 سالہ مشتبہ ملزم کو گرفتار کرلیا، حکام مزید تحقیقات کر رہے ہیں، امریکا میں ایشیائی افراد کے خلاف نفرت میں اضافہ ہوا ہے۔
دوسری جانب  امریکا میں چھوٹا طیارہ گاڑی پر آگرا، بچے سمیت تین افراد ہلاک اور ایک شخص زخمی ہوگیا۔

طیارہ گرنے کا واقعہ فلوریڈا میں پیش آیا جو ایئرپورٹ سےاڑان بھرنے کے کچھ لمحوں بعد ہی حادثے کاشکار ہو کر شعلوں کی نذر ہوگیا، سنگل انجن طیارے میں سوار دو افراد موقع پر ہی ہلاک ہوگئے جبکہ گاڑی میں موجود بچہ بھی دم توڑگیا۔

زخمی شخص کو فوری طور پر ہسپتال منتقل کردیا گیا، حادثے کے بعد گاڑی بھی مکمل طورپر تباہ ہوگئی، سکیورٹی حکام نے تحقیقات شروع کردی ہیں۔