سعودی عرب کی خطے میں مسلمانوں اور پاکستان کے سب سے بڑے دشمن بھارت کے ساتھ اربوں ڈالر کی تجارت

?️ 6 جون 2021

ریاض (سچ خبریں)  سعودی عرب نے خطے میں مسلمانوں اور پاکستان کے سب سے بڑے دشمن بھارت کے ساتھ اربوں ڈالر کی تجارت شروع کررکھی ہے اور اب یہ تجارت 33 ارب ڈالر سے تجاوز کرچکی ہے۔

تفصیلات کے مطابق سعودی عرب میں تعینات بھارتی سفیر نے کہا ہے کہ دونوں ممالک کے درمیان دوطرفہ تجارت کا حجم 33 ارب ڈالر سے تجاوز کر گیا ہے۔

بھارتی سفیر ڈاکٹر اوصاف سعید نے یہ بیان ایک ایسے وقت میں دیا ہے جب دونوں ممالک کے مابین سفارتی تعلقات کے قیام کے 75 سال مکمل ہو چکے ہیں۔

موصولہ اطلاعات کے مطابق سفارتی تعلقات کی پچھترویں سالگرہ کے موقع پر سعودی عرب میں بھارت کے سفیر ڈاکٹر اوصاف سعید نے بتایا کہ دونوں ممالک کے مابین سفارتی تعلقات کی گہرائی بہت مضبوط ہے۔

انہوں نے مزید کہا کہ یہ محض دعویٰ نہیں بلکہ حقائق اور اعداد وشمار اس کی تصدیق کرتے ہیں، دونوں ممالک کے مابین تجارتی تبادلے کا حجم 33 ارب ڈالر تک پہنچ چکا ہے۔

عرب ٹی وی کو انٹرویو میں انہوں نے بتایا کہ سعودی عرب اس وقت ایک اہم ترین ملک ہے، ان کا ملک خلیجی خطے، مشرق وسطیٰ اور شمالی افریقا میں مضبوط سفارتی تعلقات برقرار رکھے ہوئے ہے،  سعودی عرب ان میں اہم ترین ہے۔

ان کا کہنا تھا کہ سعودی ولی عہد شہزادہ محمد بن سلمان کی زیر قیادت آج سعودی عرب میں ادارہ جاتی کام ایک اچھی علامت ہے، یہی وجہ سے ہم اپنے معاشی، سیاسی اور معاشرتی پہلوؤں پر اپنے مستقبل کے کام کی بنیاد رکھتے ہیں۔

ڈاکٹر اوصاف نے مزید کہا کہ چین، امریکا اور متحدہ عرب امارات کے بعد سعودی عرب بھارت کا چوتھا تجارتی شراکت دار ہے۔