اسرائیل اور سعودی عرب کے درمیان تعلقات کی بحالی کے بارے میں نیتن یاہو کا دعوی

?️ 5 فروری 2025

سچ خبریں:اسرائیلی وزیر اعظم بنیامین نیتن یاہو نے کہا ہے کہ اسرائیل اور سعودی عرب کے درمیان تعلقات کی بحالی ناگزیر ہے اور یہ جلد مکمل ہو جائے گی۔

لبنانی خبر رساں ادارے النشرہ کی رپورٹ کے مطابق، امریکی صدر ڈونلڈ ٹرمپ اور اسرائیلی وزیر اعظم بنیامین نیتن یاہو کی مشترکہ پریس کانفرنس میں غزہ کے مستقبل کی حیثیت اور سعودی عرب کے ساتھ اسرائیل کے تعلقات معمول پر لانے کے معاملات زیر بحث آئے۔

یہ پڑھیں: اسرائیل اور سعودی عرب کے درمیان تعلقات کے معمول پر آنے میں وقت کا مسئلہ ہے: صیہونی ربی

اس موقع پرنیتن یاہو نے دعویٰ کیا کہ ٹرمپ کا غزہ پر امریکی کنٹرول کا منصوبہ تاریخ بدل سکتا ہے،انہوں نے کہا کہ امریکہ کا غزہ سے متعلق منصوبہ انتہائی اہم ہے اور اس پر عملدرآمد خطے میں ایک بڑی تبدیلی لا سکتا ہے۔

نیتن یاہو نے ایک بار پھر اس بات پر زور دیا کہ وہ سعودی عرب کے ساتھ تعلقات معمول پر لانے کے لیے پرعزم ہیں۔

انہوں نے مزید کہا کہ میرا یقین ہے کہ سعودی عرب کے ساتھ امن کا امکان محض ایک نظریہ نہیں، بلکہ یہ ایک یقینی حقیقت ہے جو بہت جلد عملی شکل اختیار کر لے گی۔

مزید پڑھیں: اسرائیل اور سعودی عرب کے درمیان تعلقات کی بحالی پر بات چیت جاری ہے:صیہونی میڈیا

پریس کانفرنس کے اختتام پر، نیتن یاہو نے ڈونلڈ ٹرمپ کو اسرائیل کا سب سے بڑا حامی قرار دیا اور کہا کہ میں یہ پہلے بھی کہہ چکا ہوں اور دوبارہ کہہ رہا ہوں کہ تم وائٹ ہاؤس میں اسرائیل کے سب سے بڑے دوست ہو، اسی وجہ سے ہم تمہاری بے حد عزت کرتے ہیں۔