ایران کا مسقط مذاکرات میں فوری پابندیاں ختم کرنے کا مطالبہ :امریکی اخبار  

سچ خبریں:ایران نے عمان کے دارالحکومت مسقط میں امریکہ کے ساتھ ہونے والے بالواسطہ مذاکرات میں پابندیوں کے فوری خاتمے کا مطالبہ کیا ہے۔

یہ بھی پڑھیں:ایران نے امریکہ کو بالواسطہ مذاکرات کی تجویز کیوں دی؟

لندن سے شائع ہونے والے روزنامہ الشرق الاوسط نے وال اسٹریٹ جرنل کے حوالے سے لکھا ہے کہ ایرانی وفد نے مذاکرات کے دوران امریکی فریق سے مطالبہ کیا کہ ایران کے بیرونِ ملک منجمد اربوں ڈالر کے اثاثوں تک فوری رسائی فراہم کی جائے۔

رپورٹ کے مطابق، ایران نے واضح طور پر امریکہ سے کہا ہے کہ وہ منجمد شدہ اثاثے ،جن کی مالیت اربوں ڈالر ہے ، کو آزاد کرے تاکہ ایران اپنی مالی ضروریات پوری کر سکے۔

ایرانی حکام نے مذاکرات میں واشنگٹن کی جانب سے ایرانی تیل کے چینی خریداروں پر ڈالے جانے والے دباؤ کو بھی ختم کرنے کا مطالبہ کیا، ایران کے مطابق یہ اقدام پابندیاں کم کرنے کے مجموعی فریم ورک کا حصہ ہونا چاہیے۔

وال اسٹریٹ جرنل کے مطابق، ایران نے بدلے میں 2015 کے جوہری معاہدے میں طے شدہ یورینیم کی افزودگی کی سطح پر واپسی کے لیے آمادگی ظاہر کی ہے، یعنی ایران دوبارہ اُس افزودگی سطح پر واپس جانے کو تیار ہے جو بین الاقوامی برادری کے ساتھ معاہدے میں متعین کی گئی تھی۔

رپورٹ میں مزید بتایا گیا ہے کہ ایران کے اعلیٰ سفارت کار عباس عراقچی نے مذاکرات کے دوران تہران کی سرخ لکیریں (Red Lines) امریکی حکام تک پہنچا دی ہیں۔

ایرانی ذرائع کے مطابق، ایران نے ایک بار پھر واضح کر دیا ہے کہ اُس کا جوہری پروگرام مکمل طور پر صلح آمیز (پرامن) نوعیت کا ہے، اور وہ کسی بھی ایسی شرط کو قبول نہیں کرے گا جس میں اس پروگرام کو مکمل طور پر بند کرنے کی بات کی گئی ہو۔

واضح رہے کہ مسقط میں ہونے والے یہ مذاکرات ایران کے معاشی مطالبات اور امریکہ کی پابندیاں کم کرنے کی ممکنہ پالیسی کے درمیان توازن پیدا کرنے کی ایک تازہ کوشش کے طور پر دیکھے جا رہے ہیں۔

مزید پڑھیں:ایران امریکہ مذاکرات؛ 4 چیزوں پر ٹرمپ کا اتفاق

 ایران کی جانب سے مالی اثاثوں کی آزادی اور تیل کی فروخت پر دباؤ کے خاتمے کا مطالبہ، موجودہ اقتصادی دباؤ کو کم کرنے کی ایک اہم کوشش ہے، جب کہ امریکہ کی نظر میں شاید یہ اعتماد سازی کے ابتدائی اقدامات ہو سکتے ہیں۔