حماس کا اسلامی اور عربی ممالک کے رہنماؤں سے مطالبہ

?️ 9 نومبر 2024

سچ خبریں:اسلامی مزاحمتی تحریک حماس نے ریاض میں ہونے والے اجلاس میں شریک اسلامی اور عربی ممالک کے رہنماؤں سے مطالبہ کیا کہ وہ شہر قدس کے حوالے سے اپنی ذمہ داریوں کو پورا کریں اور اس کے تحفظ کے لیے اقتصادی اور سیاسی دباؤ کے آلات کو فعال کریں۔

شہاب نیوز ایجنسی کی رپورٹ کے مطابق حماس نے ریاض میں ہونے والے اجلاس میں شریک اسلامی اور عربی ممالک کے رہنماؤں سے اپیل کی ہے کہ وہ شہر قدس کی حمایت میں اپنی ذمہ داریوں کا ادراک کرتے ہوئے اقتصادی اور سیاسی دباؤ کے اقدامات کو بروئے کار لائیں۔

یہ بھی پڑھیں: مزاحمتی محور کے خلاف عربی عبرانی بلاک کا افسانہ کہاں گیا؟

حماس کے سیاسی دفتر کے رکن، ہارون ناصرالدین نے کہا کہ ہم ریاض کے اجلاس میں موجود عرب اور اسلامی ممالک سے مطالبہ کرتے ہیں کہ وہ مقبوضہ شہر قدس کے حوالے سے اپنے فرائض سرانجام دیں۔

انہوں نے کہا کہ اب وقت آ گیا ہے کہ اسلامی ممالک اپنی دینی اور سیاسی ذمہ داریوں کو نبھائیں کیونکہ قدس کو صیہونی حکومت کے شدت پسند کابینہ کی جانب سے منظم یہودی سازی کی خطرناک مہم کا سامنا ہے۔”

انہوں نے مزید کہا کہ اسلامی ممالک کے پاس عالمی سطح پر صیہونی دشمن کی فلسطینی عوام اور اسلامی مقدسات کے خلاف جرائم کو روکنے کے لیے اقتصادی اور سیاسی اثر و رسوخ کے آلات موجود ہیں۔

حماس کے اس سینئر رکن نے اسلامی سربراہی اجلاس کے سابقہ فیصلوں پر عمل درآمد کی اہمیت پر زور دیا، جو قدس اور مسجد اقصیٰ کی حالت میں کسی قسم کی تبدیلی کے خلاف ہیں، اور ممالک سے مطالبہ کیا کہ وہ سفارتخانے قدس سے باہر منتقل کریں۔

مزید پڑھیں: رفح میں مصری حکومت کی کارروائی اسلامی عرب اخلاقیات کی خلاف ورزی

انہوں نے صیہونی آباد کاروں کے مسجد اقصیٰ پر بڑھتے ہوئے حملوں اور خاص طور پر سلوان کے علاقے میں فلسطینیوں کے گھروں کی مسماری کی کارروائیوں کا حوالہ دیتے ہوئے کہا کہ یہ اقدامات شہر قدس پر مکمل کنٹرول حاصل کرنے اور صیہونی حکومت کے یہودی سازی کے ارادے کی نشاندہی کرتے ہیں۔