ارمنستان کی جانب سے امریکی تجویز مسترد

سچ خبریں:ارمنستان نے امریکہ کی 100 سالہ نگرانی میں زنگزور راہداری کے کنٹرول کی تجویز کو مسترد کر دیا ہے۔ وزارت خارجہ کا کہنا ہے کہ اپنی حاکمیت کے دائرے میں کسی تیسرے فریق کو اختیار دینے پر کبھی بات نہیں کی گئی۔

ارمنستان نے امریکہ کی جانب سے پیش کی گئی زنگزور راہداری پر 100 سالہ نگرانی کی تجویز کو سختی سے مسترد کرتے ہوئے واضح کیا ہے کہ وہ اپنی خودمختاری کے دائرے میں کسی تیسرے ملک کو کسی بھی قسم کا کنٹرول نہ پہلے دیا ہے اور نہ ہی آئندہ دے گا۔

یہ بھی پڑھیں:زنگزور کوریڈور کے 2028 میں شروع ہونے کا امکان

آرمن پرس سرکاری خبر رساں ویب سائٹ نے ہفتے کی رات (23 جولائی) کو ارمنستان کی وزارت خارجہ کی ترجمان نازلی باغداساریان کے حوالے سے رپورٹ کیا کہ

ارمنستان علاقائی انفراسٹرکچر کی بحالی کے مسئلے کو صرف جمہوریہ ارمنستان کی خودمختاری، علاقائی سالمیت، اور عدالتی دائرہ کار کے دائرے میں دیکھتا ہے۔

ترجمان کا کہنا تھا کہ ہم نے اپنی حاکمیت میں شامل کسی بھی علاقے کا کنٹرول کسی تیسرے فریق کو دینے پر کبھی کوئی بات نہیں کی اور نہ کریں گے۔

اس بیان سے قبل، مشرقِ وسطیٰ پر نظر رکھنے والی معروف ویب سائٹ مڈل ایسٹ آئی نے ترکی میں متعین امریکی سفیر ٹام باراک کے حوالے سے انکشاف کیا تھا کہ

واشنگٹن نے ارمنستان اور آذربائیجان کے درمیان واقع 32 کلومیٹر طویل زنگزور راہداری پر آئندہ 100 سال کے لیے کنٹرول سنبھالنے کی پیشکش کی ہے۔

مزید پڑھیں:نسل کشی پر دنیا کا ردعمل، لیکن ہونےکے بعد!

باراک کے بقول اس اقدام کا مقصد دونوں ممالک کو راہداری کے استعمال کی ضمانت دینا اور باہمی سفارتی مذاکرات کو آگے بڑھانے میں مدد فراہم کرنا ہے۔