بنگلہ دیش میں جاری سیاسی بحران میں اضافہ

🗓️ 6 اگست 2024

سچ خبریں: بنگلہ دیش میں طلبا تحریک کے رہنماؤں نے فوج کی جانب سے ملک میں عبوری حکومت کے قیام کو مسترد کرتے ہوئے اپنی تجاویز پیش کی ہیں۔

شیخ حسینہ واجد کے احتجاج میں اہم کردار ادا کرنے والے رہنما ناہید اسلام نے عبوری حکومت کو تسلیم کرنے سے انکار کرتے ہوئے کہا کہ ملک میں عبوری حکومت ہماری تجاویز پر بنے گی۔

یہ بھی پڑھیں: بنگلہ دیش نہایت نازک صورتحال میں

نامعلوم مقام سے طلبا تحریک کے سرکردہ رہنماؤں نے اپنے ویڈیو پیغام میں فوج سے نوبل انعام یافتہ ڈاکٹر محمد یونس کی سربراہی میں عبوری حکومت قائم کرنے کا مطالبہ کیا ہے۔

ویڈیو پیغام دینے والے رہنماؤں میں ناہید اسلام، آصف محمود اور ابوبکر مازوم دار شامل ہیں، ان کا کہنا تھا کہ ڈاکٹر یونس عبوری حکومت کی سربراہی کرنے کو تیار ہیں، جبکہ دیگر ارکان کے نام آج دیئے جائیں گے۔

مزید پڑھیں: بنگلہ دیش کی صورتحال

طلبا تحریک کے رہنما ناہید اسلام نے مزید کہا کہ ڈاکٹر یونس کی سربراہی میں قائم ہونے والی عبوری حکومت میں سول سوسائٹی سمیت تمام شعبوں کی نمائندگی کو یقینی بنایا جائے گا،یہ حکومت اگلے 24 گھنٹوں میں اپنا کام شروع کر دے گی۔

یاد رہے کہ اس ملک میں ایک ماہ سے جاری پرتشدد مظاہروں اور ان میں سیکڑوں ہلاکتوں کے بعد بنگلادیشی وزیراعظم شیخ حسینہ واجد استعفیٰ دے کر ملک سے فرار ہو گئی ہیں۔