یمن, صہیونی انٹیلی جنس کی ناکامیوں کا نیا میدان

یمن, صہیونی انٹیلی جنس کی ناکامیوں کا نیا میدان

 اسرائیلی فضائیہ کا حالیہ حملہ صنعاء میں انصاراللہ کی قیادت کو نشانہ بنانے میں ناکام رہا، جسے ماہرین تل ابیب کی انٹیلی جنس کے بڑے بحران کی علامت قرار دے رہے ہیں۔ اس ناکامی نے واضح کر دیا ہے کہ اسرائیل یمن میں ایک پیچیدہ اور چند جہتی اطلاعاتی چیلنج کا سامنا کر رہا ہے، جو خطے کے تزویراتی توازن کو بھی بدل سکتا ہے۔

اسرائیلی میڈیا نے جمعرات کے حملے کو "انتہائی درست معلومات” پر مبنی قرار دیا تھا اور دعویٰ کیا تھا کہ اس میں یمن کے اہم فوجی و سیاسی رہنماؤں کو نشانہ بنایا گیا ہے، مگر مقامی حکام نے فوری طور پر یہ دعویٰ مسترد کر دیا اور کہا کہ کوئی بھی اعلیٰ کمانڈر زخمی یا ہلاک نہیں ہوا۔

یمن کی اعلیٰ سیاسی کونسل کے سربراہ مہدی المشاط نے اسرائیل کو متنبہ کرتے ہوئے کہا کہ صہیونی حملے ہمیشہ کی طرح ناکام رہیں گے اور یمن کے عوام اسرائیل کو سبق سکھائیں گے۔ انصاراللہ کے سیاسی دفتر کے رکن حزام الاسد نے بھی اسرائیلی بیانیے کو "خیالی کامیابی کا ڈھونگ” قرار دیا۔

یمن میں صہیونی انٹیلی جنس کو درپیش مسائل کئی پہلو رکھتے ہیں:جغرافیائی مشکل: یمن کے پہاڑی اور قبائلی علاقوں میں ڈرونز اور سیٹلائٹ نگرانی مؤثر ثابت نہیں ہو پا رہی، بالکل ویسا ہی جیسا مسئلہ اسرائیل کو جنوبی لبنان میں حزب اللہ کے خلاف درپیش رہا۔

امریکی انحصار: اسرائیل کی معلوماتی نظام امریکی انٹیلی جنس پر بہت زیادہ انحصار کرتا ہے، حالانکہ امریکہ کے اپنے ڈرون بارہا یمن میں ناکام ہوئے ہیں۔

غلط تخمینے: تل ابیب اور اس کے اتحادی یمنی عسکری اور تکنیکی صلاحیتوں کو مسلسل کمتر سمجھتے رہے، مگر انصاراللہ نے ڈرونز، بیلسٹک اور ہائپر سونک میزائلوں سمیت جدید ہتھیاروں میں خود انحصاری حاصل کر لی ہے۔

ثقافتی رکاوٹیں: یمن کی مقامی زبان، قبائلی ڈھانچے اور مذہبی روایات صہیونی انٹیلی جنس کے لیے نفوذ تقریباً ناممکن بنا دیتے ہیں۔

انصاراللہ کی غیرمتمرکز ساخت: اس تحریک کا فیصلہ سازی نظام تقسیم شدہ ہے، جس سے اسرائیل کے لیے کسی ایک "مرکز” کو نشانہ بنا کر پورے ڈھانچے کو مفلوج کرنا مشکل ہے۔

ماہرین کے مطابق صنعاء میں ناکام کارروائی اسرائیل کی بنیادی انٹیلی جنس کمزوریوں کو بے نقاب کرتی ہے۔ یمن کی جغرافیائی و سماجی پیچیدگیاں اور انصاراللہ کی لچکدار حکمتِ عملی تل ابیب کو ایک ایسے بحران میں مبتلا کر چکی ہیں جس سے نکلنا آسان نہیں۔ اس صورتحال میں امکان یہ ہے کہ یمن اسرائیلی انٹیلی جنس کی شکستوں کا نیا میدان ثابت ہوگا۔