کینیڈا کا اسرائیل کے ساتھ تعلقات پر نظرِ ثانی کا اعلان

کینیڈا کا اسرائیل کے ساتھ تعلقات پر نظرِ ثانی کا اعلان

کینیڈا نے اعلان کیا ہے کہ وہ قطر کے دارالحکومت دوحہ پر اسرائیلی میزائل حملے کے بعد تل ابیب کے ساتھ اپنے تعلقات پر از سرِ نو غور کرے گا۔

کینیڈین وزیر خارجہ ملانی جولی نے کہا کہ یہ حملہ ناقابلِ قبول ہے، خاص طور پر اس وقت جب قطر خطے میں امن قائم کرنے اور مذاکرات کو آگے بڑھانے کی کوششوں میں مصروف ہے۔اس سے قبل یورپی کمیشن بھی عندیہ دے چکا ہے کہ یورپی یونین اسرائیل کے ساتھ تجارتی معاہدوں کو معطل کرنے پر غور کر رہا ہے۔

کینیڈا نے وزیر اعظم مارک کارنی کی قیادت میں اسرائیل کے حوالے سے اپنی پالیسی کو سخت کر لیا ہے۔ کارنی، جنہوں نے رواں سال جنوری میں جسٹن ٹروڈو کی جگہ وزارتِ عظمیٰ سنبھالی، حال ہی میں اعلان کر چکے ہیں کہ کینیڈا ستمبر میں اقوام متحدہ کی جنرل اسمبلی کے دوران آزاد فلسطینی ریاست کو باضابطہ طور پر تسلیم کرے گا۔

یاد رہے کہ گزشتہ روز اسرائیل نے دوحہ میں حماس کی قیادت کے دفتر پر اس وقت میزائل حملہ کیا جب وہاں امریکی صدر ڈونلڈ ٹرمپ کی نئی تجویز پر مذاکرات جاری تھے۔ اس حملے میں اگرچہ بعض حماس کے ارکان اور شہری جاں بحق ہوئے، تاہم اعلیٰ قیادت محفوظ رہی۔