غزہ میں صحافیوں کو نشانہ بنایا جا رہا ہے، مگر سچ کو نہیں مارا جا سکتا

غزہ میں صحافیوں کو نشانہ بنایا جا رہا ہے، مگر سچ کو نہیں مارا جا سکتا

 عراقی صحافی اور میڈیا ماہر سید باقر الحیدری نے کہا ہے کہ غزہ میں صحافی باقاعدہ ایک فوجی ہدف بن چکے ہیں، لیکن حقیقت کو کبھی خاموش نہیں کیا جا سکتا۔ ان کا کہنا ہے کہ ایک صحافی شہید ہو سکتا ہے مگر اس کے الفاظ ہمیشہ زندہ رہتے ہیں اور اس کا خون آنے والی نسلوں کے لیے نئی روشنائی بن جاتا ہے۔

الحیدری نے گفتگو میں کہا کہ ۷ اکتوبر ۲۰۲۳ سے اب تک غزہ دنیا کا سب سے بڑا صحافیوں کا قبرستان بن چکا ہے۔ صرف چند ماہ میں ۲۴۶ فلسطینی صحافی شہید ہو چکے ہیں، جن میں رپورٹرز، فوٹو جرنلسٹ اور ایڈیٹرز شامل ہیں۔ حالیہ دنوں میں بھی پانچ صحافی بیک وقت ناصر اسپتال کے قریب اسرائیلی حملے میں شہید ہوئے۔

انہوں نے کہا کہ صہیونی فوج جان بوجھ کر صحافیوں کو نشانہ بناتی ہے، کیونکہ وہ سچ سے ڈرتی ہے۔ بین الاقوامی میڈیا کو غزہ جانے سے روکا گیا ہے اور صرف مقامی صحافی رہ گئے ہیں جنہیں روزانہ کے اہداف میں بدل دیا گیا ہے۔ یہاں تک کہ پریس کی جیکٹس اور نشان والے گاڑیاں بھی براہِ راست نشانہ بنتی ہیں۔

الحیدری کے مطابق، صحافی بھوک، قحط، محاصرے اور بمباری کے باوجود ہمت نہیں ہارتے کیونکہ ان کا یقین ہے کہ قلم اور تصویر کی طاقت کسی بھی ہتھیار سے زیادہ ہے۔ کئی صحافی اپنے گھرانے کھو چکے ہیں، مگر اگلے دن پھر کیمرہ اور قلم کے ساتھ میدان میں موجود ہوتے ہیں۔

انہوں نے کہا ایک شہید صحافی کی جگہ کئی اور قلم اٹھانے والے کھڑے ہو جاتے ہیں۔ اسرائیل سچ کو نہیں مار سکتا۔

عراقی صحافی نے عالمی برادری اور انسانی حقوق کی تنظیموں سے اپیل کی کہ وہ خاموشی توڑیں۔ اگر کسی اور جگہ ایک صحافی کے قتل پر دنیا احتجاج کرتی ہے تو غزہ میں دو سو سے زائد صحافیوں کی شہادت پر یہ خاموشی کیوں؟ انہوں نے کہا کہ یہ وقت ہے کہ آزادانہ تحقیقات ہوں اور دوہرے معیار ختم کیے جائیں۔

ان کا کہنا تھا کہ غزہ کے شہید صحافیوں کا خون تاریخ کا حصہ بن چکا ہے اور ان کی آواز ہمیشہ باقی رہے گی، چاہے اشغالگر کتنی ہی کوشش کریں کہ کیمروں اور قلموں کو خاموش کر سکیں۔