کیا یوکرین جنگ میں ایٹمی ہتھیار استعمال ہو سکتے ہیں؟بائیڈن کیا کہتے ہیں؟

?️ 20 جون 2023

سچ خبریں:بیلاروس کی سرزمین پر روس کے ٹیکٹیکل جوہری ہتھیاروں کی تعیناتی کے ردعمل میں امریکی صدر نے خبردار کیا کہ روسی صدر کی جانب سے دی جانے والی جوہری ہتھیاروں کے استعمال کی دھمکی حقیقی خطرہ ہے۔

یاہو نیوز کی رپورٹ کے مطابق بیلاروس میں روس کے ٹیکٹیکل جوہری ہتھیاروں کی تعیناتی کے ردعمل میں امریکی صدر جو بائیڈن نے خبردار کیا کہ روسی صدر ولادیمیر پیوٹن کی جانب سے ضرورت پڑنے پر جوہری ہتھیاروں کے استعمال کی دھمکیاں حقیقی خطرہ ہیں اور انہیں سنجیدگی سے لینا چاہیے۔

یہ بھی پڑھیں:پیوٹن جوہری ہتھیاروں کے استعمال کے بارے میں مذاق نہیں کر رہے ہیں:  بائیڈن

انہوں نے کہا کہ جب میں دو سال قبل صدر بنا تو میں نے کہا تھا کہ میں کولوراڈو دریا کے خشک ہونے کی وجہ سے پریشان ہوں تو اس وقت ہر کوئی مجھے اس طرح دیکھ رہا تھا جیسے میں پاگل ہوں۔

بائیڈن کا کہنا تھا کہ اس وقت بھی جب میں نے پیوٹن کے ہاتھوں جوہری ہتھیاروں کے استعمال کے امکان کے بارے میں کہا تب بھی میرے ساتھ ویسا ہی کیا گیا جبکہ یہ خطرہ (پیوٹن) حقیقی ہے۔

مزید:روس کے ایٹمی ہتھیاروں نے مغرب کو ماسکو کے خلاف اعلان جنگ کرنے سے روکا

یاد رہے کہ جو بائیڈن کی جانب سے یہ انتباہ ایسے وقت میں سامنے آیا ہے جب امریکی وزیر خارجہ انتھونی بلنکن نے جمعے کو بیلاروس میں ٹیکٹیکل جوہری ہتھیاروں کی پہلی کھیپ کی تعیناتی کے ردعمل میں کہا تھا کہ روس کے جوہری ہتھیاروں کے استعمال کے ارادے اور فیصلے کے کوئی آثار نہیں ہیں۔

واضح رہے روس کے صدر ولادیمیر پیوٹن نے جمعہ کو سینٹ پیٹرزبرگ انٹرنیشنل اکنامک فورم میں تصدیق کی کہ روس کی جانب سے ٹیکٹیکل نیوکلیئر وار ہیڈز کی پہلی کھیپ بیلاروسی سرزمین پر تعینات کی گئی ہے۔

درایں اثنا بیلاروس کے صدر الیگزینڈر لوکاشینکو نے گزشتہ بدھ کو اعلان کیا تھا کہ انہیں روس کی ٹیکٹیکل جوہری ہتھیاروں کی کھیپ ملنا شروع ہو گئی ہے، ان کا کہنا تھا کہ ان میں سے کچھ ہتھیار ان ایٹم بموں سے تین گنا زیادہ طاقتور ہیں جو امریکہ نے ہیروشیما اور ناگاساکی پر گرائے تھے۔