چین کے ساتھ طویل جنگ میں امریکہ کو شکست کا خطرہ:امریکی جریدہ

چین کے ساتھ طویل جنگ میں امریکہ کو شکست کا خطرہ:امریکی جریدہ

 امریکی جریدے دی اٹلانٹک نے اپنی ایک تازہ رپورٹ میں خبردار کیا ہے کہ اگر امریکہ چین کے ساتھ کسی طویل اور فرسایشی جنگ میں داخل ہوتا ہے، تو ممکنہ طور پر اسے شکست کا سامنا کرنا پڑ سکتا ہے۔ یہ ناکامی میدانِ جنگ میں کمزوری کے باعث نہیں بلکہ امریکہ کی صنعتی پیداوار اور طویل مدتی عسکری صلاحیت میں کمی کی وجہ سے ہوگی۔

رپورٹ میں کہا گیا ہے کہ جدید جنگوں کا فیصلہ بہادری سے نہیں بلکہ پیداواری صلاحیت، ٹیکنالوجی پر عبور اور فوجی قوت کی تیزی سے بحالی سے ہوتا ہے۔

اٹلانٹک کے مطابق، یوکرین کی جنگ نے واضح کیا ہے کہ کسی بھی فرسایشی جنگ میں کامیابی کے لیے بھاری مقدار میں اسلحہ، ڈرونز اور دور مار نظام تیار کرنے کی صلاحیت درکار ہوتی ہے  اور ان تمام شعبوں میں چین امریکہ پر نمایاں برتری رکھتا ہے۔

مزید کہا گیا ہے کہ اگرچہ امریکہ کے پاس ایک جدید اور تجربہ کار فوج موجود ہے، لیکن وہ صنعتی ڈھانچے کی کمزوری کے باعث اپنے ضائع شدہ ہتھیاروں کو تیزی سے بدلنے میں ناکام ہے۔ دوسری جانب چین بڑی رفتار سے نئے ہتھیار تیار کرنے کی صلاحیت رکھتا ہے، جبکہ امریکہ کو جہاز سازی، ڈرون سازی اور پرزہ جات کی فراہمی میں مشکلات درپیش ہیں۔

رپورٹ کے مطابق، اگر واشنگٹن نے اپنی صنعتی صلاحیت بحال کرنے اور اسٹریٹجک اتحادوں کو مضبوط کرنے پر توجہ نہ دی اور صرف فوجی بہادری پر انحصار کیا، تو ممکن ہے وہ جنگ کے ابتدائی مرحلے میں کچھ کامیابی حاصل کرے، مگر طویل مدت میں چین کے سامنے شکست کھا جائے۔

اسی سلسلے میں، امریکی روزنامہ "وال اسٹریٹ جرنل” نے بھی انکشاف کیا ہے کہ پینٹاگون نے ممکنہ چین سے جنگ کی تیاری کے طور پر امریکی اسلحہ ساز کمپنیوں کو ہدایت دی ہے کہ وہ اپنی پیداوار کو دو سے چار گنا تک بڑھائیں۔

رپورٹ کے مطابق، وزارتِ جنگ نے ۱۲ اہم ہتھیاروں کی پیداوار میں تیزی لانے کے لیے دفاعی صنعت کے اعلیٰ نمائندوں سے متعدد اجلاس کیے ہیں۔ نائب وزیرِ جنگ اسٹیو فینبرگ اس عمل کی براہِ راست نگرانی کر رہے ہیں اور وہ ہتھیار ساز کمپنیوں کے سربراہان سے ہفتہ وار بنیاد پر رابطے میں رہتے ہیں تاکہ اس عمل کو تیز کیا جا سکے۔