پاکستانی اور سعودی وزراے خارجہ کا ٹیلفونک رابطہ 

پاکستان کے وزیرِ خارجہ محمد اسحاق ڈار نے کہا ہے کہ افغانستان کے خلاف کی گئی فوجی کارروائی پاکستان کی خودمختاری اور علاقائی سالمیت کے دفاع کے لیے تھی۔

سرکاری بیان کے مطابق نائب وزیرِاعظم و وزیرِ خارجہ اسحاق ڈار، جو جدہ میں اسلامی تعاون تنظیم کے ہنگامی اجلاس میں شرکت کے لیے موجود ہیں، نے سعودی عرب کے وزیرِ خارجہ شہزادہ فیصل بن فرحان اور ترکیہ کے وزیرِ خارجہ ہاکان فیدان سے ٹیلیفونک رابطہ کیا۔ گفتگو کے دوران پاکستان اور افغانستان کی سرحد پر حالیہ کشیدگی سمیت علاقائی صورتحال پر تبادلۂ خیال کیا گیا۔

پاکستانی وزارتِ خارجہ کے مطابق اسحاق ڈار نے اپنے سعودی اور ترک ہم منصبوں کو افغانستان کی جانب سے مبینہ “بلااشتعال جارحیت” کے جواب میں پاکستان کے اقدامات سے آگاہ کیا۔ انہوں نے کہا کہ پاکستانی مسلح افواج نے “غضب للحق” کے نام سے ایک ہدفی اور کامیاب آپریشن کیا، جس کا مقصد ملکی خودمختاری اور علاقائی سالمیت کا تحفظ تھا۔

رپورٹس کے مطابق پاکستان اور افغان طالبان کے درمیان سرحدی جھڑپوں کا نیا مرحلہ گزشتہ شب شروع ہوا، جسے رواں برس اکتوبر کے بعد دونوں ہمسایہ ممالک کے درمیان دوسرا مہلک تصادم قرار دیا جا رہا ہے۔ پاکستانی حکام کا کہنا ہے کہ طالبان کی جانب سے حملوں کے جواب میں خصوصی آپریشن شروع کیا گیا، جبکہ وزیرِ اطلاعات نے دعویٰ کیا کہ جھڑپوں میں کم از کم 133 افغان سرحدی اہلکار ہلاک ہوئے۔

سیکیورٹی ذرائع کے مطابق پاکستانی فورسز نے توپ خانے کے ساتھ ساتھ فضائی کارروائی بھی کی، جس میں کابل، ننگرہار اور قندھار میں متعدد اہداف کو نشانہ بنایا گیا۔ افغان طالبان کے ترجمان نے بھی فضائی حملوں کی تصدیق کی ہے۔

یہ پیش رفت گزشتہ ہفتے پاکستان کی جانب سے سرحدی علاقوں میں کیے گئے فضائی حملوں کے بعد سامنے آئی ہے، جن کے بارے میں اسلام آباد کا دعویٰ تھا کہ ان میں تحریک طالبان پاکستان کے ٹھکانوں کو نشانہ بنایا گیا اور 80 شدت پسند مارے گئے۔ تاہم افغان طالبان نے ان حملوں کی مذمت کرتے ہوئے کہا کہ اس دوران درجنوں شہری جاں بحق ہوئے۔

ادھر پاکستانی میڈیا کے مطابق سرحدی جھڑپوں میں کمی آئی ہے اور آج شام پاک فوج کے ترجمان کی جانب سے سرحدی صورتحال پر بریفنگ متوقع ہے۔

دوسری جانب ایران کے وزیرِ خارجہ سید عباس عراقچی نے افغانستان اور پاکستان پر زور دیا ہے کہ وہ تحمل کا مظاہرہ کریں اور اختلافات کو بات چیت کے ذریعے حل کریں۔ انہوں نے سوشل میڈیا پیغام میں کہا کہ رمضان المبارک کے مہینے میں دونوں برادر ہمسایہ ممالک کو حسنِ ہمجواری کے اصولوں کے تحت مذاکرات کے ذریعے مسائل حل کرنے چاہییں۔ انہوں نے مزید کہا کہ ایران دونوں ممالک کے درمیان بات چیت میں سہولت فراہم کرنے کے لیے تیار ہے۔