اسرائیل کو انٹرسیپٹر میزائلوں کی کمی کا سامنا:صہیونی میڈیا

اسرائیل کو انٹرسیپٹر میزائلوں کی کمی کا سامنا:اسرائیلی میڈیا

اسرائیلی ٹی وی چینل 14 نے دعویٰ کیا ہے کہ ممکنہ ایرانی میزائل حملے کے خدشات کے درمیان اسرائیل کو فضائی دفاعی نظام کے لیے انٹرسیپٹر میزائلوں ی بڑھتی ہوئی کمی کا سامنا ہے، جبکہ ان میزائلوں کی پیداوار کی رفتار ان کے عملی استعمال کے مقابلے میں ناکافی ہے۔

رپورٹ کے مطابق دستیاب اعداد و شمار سے ظاہر ہوتا ہے کہ انٹرسیپٹر میزائلوں کی تیاری کی شرح ان کے استعمال کی رفتار سے ہم آہنگ نہیں، جس سے دفاعی ذخائر پر دباؤ بڑھ رہا ہے۔ چینل 14 نے خبردار کیا کہ محدود ذخائر کے پیش نظر اسرائیل کو ممکنہ تصادم کے لیے اپنی حکمت عملی پر نظرثانی کرنا ہوگی۔

رپورٹ میں خاص طور پر اسرائیل کے دفاعی نظاموں “پیکان” (ایرو) اور “فلاخنِ داؤد” (ڈیوڈز سلنگ) کا ذکر کیا گیا، جنہیں بیلسٹک اور درمیانے فاصلے تک مار کرنے والے میزائلوں کے مقابلے کے لیے استعمال کیا جاتا ہے۔ تجزیے کے مطابق کسی بھی آئندہ بڑے تصادم میں نتیجہ سخت “اسلحہ جاتی معیشت” پر منحصر ہو سکتا ہے، یعنی دستیاب وسائل کا محتاط اور ترجیحی استعمال۔ ایسی صورتحال میں دفاعی اداروں کو ممکنہ طور پر صرف اسٹریٹجک تنصیبات کے تحفظ کو اولین ترجیح دینا پڑے گی۔

ادھر امریکی اخبار نیو یارک ٹائمز نے بھی اپنی تازہ رپورٹ میں نشاندہی کی ہے کہ امریکا کو بھی دفاعی ذخائر کے دباؤ کا سامنا ہو سکتا ہے۔ رپورٹ کے مطابق واشنگٹن ایک جانب اسرائیل کو زمینی اور بحری دفاعی نظاموں میں مدد فراہم کرنا چاہتا ہے، تو دوسری جانب اسے اپنی ممکنہ فوجی ضروریات کو بھی مدنظر رکھنا ہوگا۔

امریکی محکمہ دفاع کی سابق سینئر عہدیدار ڈانا اسٹرول نے کہا کہ انٹرسیپٹر میزائلوں کے ذخائر لامحدود نہیں۔ ان کے بقول اگر ایران بیک وقت سینکڑوں میزائل داغنے میں کامیاب ہو جاتا ہے تو اسرائیل اور امریکا کو یہ فیصلہ کرنا پڑ سکتا ہے کہ کن میزائلوں کو روکا جائے اور کنہیں نظر انداز کیا جائے، جو ایک نہایت مشکل اور حساس فیصلہ ہوگا۔