پاکستان نے ۲۷۴ افغان اہلکار ہلاک کرنے کا دعویٰ کیا

پاکستان نے ۲۷۴ افغان اہلکار ہلاک کرنے کا دعویٰ کیا

پاک فوج کے ترجمان لیفٹیننٹ جنرل احمد شریف چوہدری نے کہا ہے کہ گزشتہ شب افغانستان کی جانب سے مبینہ جارحیت کے بعد شروع کیے گئے آپریشن میں 274 افغان اہلکار ہلاک جبکہ 12 پاکستانی فوجی جان بحق ہوئے۔ ان کا کہنا تھا کہ فوجی کارروائی تاحال جاری ہے۔

جی ایچ کیو میں پریس کانفرنس کرتے ہوئے ترجمان پاک فوج نے الزام عائد کیا کہ افغان عبوری حکومت دہشت گرد عناصر کے ساتھ ملی ہوئی ہے اور مشترکہ سرحد پر کشیدگی میں اضافہ کابل کی پالیسیوں کا نتیجہ ہے۔ انہوں نے کہا کہ افغانستان کی جانب سے حملوں کے جواب میں پاک فوج نے “غضب للحق” کے نام سے آپریشن شروع کیا، جس کے دوران درجنوں چوکیاں تباہ یا اپنے کنٹرول میں لے لی گئیں۔

لیفٹیننٹ جنرل احمد شریف چوہدری نے کہا کہ پاکستان کا پیغام افغان طالبان کے لیے واضح ہے: وہ یا تو پاکستان کے ساتھ کھڑے ہوں یا تحریک طالبان پاکستان اور بلوچ شورش پسند عناصر کا ساتھ دیں۔ انہوں نے زور دیا کہ پاکستان ہر اس مقام کو نشانہ بنائے گا جہاں سے ملکی سلامتی کو خطرہ لاحق ہوگا۔

ترجمان کے مطابق جھڑپوں میں 274 افغان سرحدی اہلکار مارے گئے اور تقریباً 400 زخمی ہوئے، جبکہ پاکستانی فوج کے 12 جوان شہید، 27 زخمی اور ایک لاپتا ہے۔ انہوں نے کابل، ننگرہار اور قندھار میں فضائی حملوں کی بھی تصدیق کی اور خبردار کیا کہ اگر رویہ تبدیل نہ کیا گیا تو کارروائیاں جاری رہیں گی۔