وینیزویلا کی اپوزیشن لیڈر ماریا کورینا ماچادو نے فوج کو بغاوت کے لئے بھیجا خفیہ پیغام

?️ 16 نومبر 2025

 وینیزویلا کی اپوزیشن لیڈر ماریا کورینا ماچادو نے فوج کو بغاوت کے لئے بھیجا خفیہ پیغام

 وینیزویلا کی اپوزیشن لیڈر ماریا کورینا ماچادو نے ایک بار پھر ملکی فوج اور پولیس کو بالواسطہ طور پر حکومت کے خلاف کھڑا ہونے اور امریکہ کے ساتھ ہم آہنگی اختیار کرنے کا پیغام دیا ہے۔ اسپین کے اخبار ایل موندو کے مطابق ماچادو نے سوشل میڈیا پر جاری ایک آڈیو پیغام میں واضح کیا کہ ’’وقت آنے پر‘‘ فوج کو فیصلہ کرنا ہوگا کہ وہ قوم کے ہیرو بنتے ہیں یا مجرم۔

ماچادو، جو امریکی عسکری مداخلت کی کھلی حامی سمجھی جاتی ہیں، نے فوجی افسران کو مخاطب کرتے ہوئے کہا کہ ان کا موجودہ فیصلہ ان کی پوری زندگی کا رخ بدل دے گا۔ انہوں نے کہا کہ تاریخ، قانون اور وینیزویلا کے عوام ان کے عمل کا فیصلہ کریں گے۔ انہوں نے فوج کو ترغیب دی کہ وہ ’’آنے والے دن‘‘ میں عوام کے ساتھ کھڑے ہوں اور آزادی‘کے لیے قدم بڑھائیں۔

اپوزیشن لیڈر نے دعویٰ کیا کہ ’’فیصلہ کن لمحہ قریب ہے اور افسران کو چاہیے کہ ’’روشن مستقبل‘‘ کا حصہ بنیں، نہ کہ تباہی کا جس کا الزام وہ صدر نکولاس مادورو کی حکومت پر لگاتی ہیں۔ ماچادو کا کہنا تھا کہ وینیزویلا کو بین الاقوامی حمایت کی ضرورت ہے اور امریکہ اس سلسلے میں قدم اٹھائے گا۔

مادورو حکومت بارہا ماچادو کے بیانات کو ملک دشمنی قرار دے چکی ہے۔ صدر مادورو نے انہیں شیطانی جادوگر تک کہا اور الزام لگایا کہ اپوزیشن رہنما امریکی مداخلت کو ہوا دے رہی ہیں۔ ماچادو نے کئی مرتبہ واشنگٹن سے مزید پابندیوں کا مطالبہ کیا ہے اور کہا ہے کہ وینیزویلا کی آزادی، امریکہ کی سلامتی ہے۔‘‘

امریکہ کی جنوبی بحرالکاہل میں فوجی سرگرمیوں، خصوصاً نیزہِ جنوبی نامی آپریشن کی افواہوں کے بعد ماچادو نے مزید اشتعال انگیز بیانات دیے ہیں۔ وہ دعویٰ کرتی ہیں کہ مادورو مجرمانہ گروہ ’’ٹرین دے ارگو کا سرغنہ ہے اور صدر ڈونلڈ ٹرمپ اس حقیقت سے آگاہ ہیں۔ ان کے مطابق امریکی اداروں کو چاہیے کہ مادورو حکومت کے ’’جرائم‘‘ کو دنیا کے سامنے لائیں۔

نوبیل امن انعام جیتنے کے فوراً بعد ماچادو نے کہا تھا کہ وہ ’’پہلے سے بڑھ کر امریکی صدر پر انحصار کرتی ہیں‘‘۔ اسی طرح ایک اسرائیلی میڈیا ادارے کو انٹرویو میں انہوں نے وعدہ کیا کہ ’’ایک دن‘‘ وینیزویلا اسرائیل کے ساتھ قریبی تعلقات قائم کرے گا اور نئی حکومت بیت المقدس میں سفارت خانہ کھولے گی۔

دوسری جانب امریکی وزیر دفاع پِیٹ ہیگسٹ نے حالیہ دنوں کہا کہ واشنگٹن کا نیا مشن مبینہ طور پر منشیات کی اسمگلنگ کو روکنے کے لیے ہے، مگر اس آپریشن کی اصل نوعیت کے بارے میں شکوک برقرار ہیں۔ صدر ٹرمپ نے بھی صحافیوں کے سوال پر کہا کہ وہ وینیزویلا کے بارے میں ’’فیصلہ کر چکے ہیں‘‘ لیکن تفصیل بتانے سے انکار کر دیا۔