نیتن یاہو جھوٹا ہے، اس پر بھروسہ نہیں کیا جا سکتا: شاس پارٹی کے چیئرمین

سچ خبریں: اسحاق یوسف، سربراہ تلمودی اور انتہا پسند جماعت شاس نے صیہونی حکومت کے وزیراعظم بنیامین نیتن یاہو کو جھوٹا اور ناقابل اعتبار قرار دیتے ہوئے کہا کہ ممکن ہے کہ یہ جماعت آئندہ انتخابات میں یشار پارٹی کے سربراہ گادی آئزن کوٹ کی حمایت کرے۔

واضح رہے کہ یوسف کا تعلق ان گروہوں سے ہے جو عموماً نیتن یاہو کے ساتھ متحد رہتے ہیں، تاہم تلمودی عناصر کی لازمی فوجی خدمات کے معاملے پر وزیراعظم اور کابینہ سے ان کے اختلافات ہیں۔ انہوں نے الزام عائد کیا کہ نیتن یاہو نے فوجی بھرتی قانون اور دیگر امور میں انہیں دھوکہ دیا ہے۔

یوسف نے صیہونی حکومت کی فوجی ریڈیو سے گفتگو میں مزید کہا کہ ہو سکتا ہے کہ ہم آئندہ انتخابات میں آئزن کوٹ کے ساتھ شامل ہوں اور حتیٰ کہ وزیراعظمی کے لیے ان کی حمایت کریں۔

اس بیان کے جواب میں آئزن کوٹ نے اسرائیلی فوجی ریڈیو کو انٹرویو دیتے ہوئے ان دعوؤں کو مسترد کر دیا اور کہا کہ وہ صرف اس اصول پر دوسروں کے ساتھ اشتراک کریں گے جس میں تمام طبقات کی لازمی فوجی خدمات پر اتفاق ہو، اور اس سلسلے میں کوئی سمجھوتہ ممکن نہیں۔

آئزن کوٹ نے مزید کہا کہ مجھے پوری امید ہے کہ شاس اور دیگر جماعتیں عقل و دانش کی راہ پر لوٹ آئیں گی اور یہ سمجھیں گی کہ نیتن یاہو کی تسلیم و رضا، خاص طور پر اس فیصلہ کن ہفتے میں، اسرائیل اور اس کی فوج کو کمزور کرے گی۔ اگر وہ اس ہفتے نیتن یاہو کے دباؤ کے باعث کچھ مراعات حاصل کر بھی لیتے ہیں، تو مجھے امید ہے کہ کنست (پارلیمنٹ) میں ایسے نمائندے موجود ہوں گے جو انہیں روک سکیں۔