میرے دورہ روس کا مقصد دوستی، تعاون اور امن کو مضبوط بنانا ہے:چینی صدر

?️ 20 مارچ 2023

سچ خبریں:چینی صدر شی جن پنگ کا کہنا ہے کہ ان کے دورہ روس کا مقصد دونوں ممالک کے درمیان دوستی اور امن کو مضبوط بنانا ہے۔

اسپوٹنک نیوز ایجنسی کی رپورٹ کے مطابق چینی صدر شی جن پنگ نے آر آئی اے نووستی اور روسکایا گازیٹا اخبار کو بھیجے گئے ایک کالم میں کہا کہ ان کے دورہ روس کا مقصد دونوں ممالک کے درمیان امن اور دوستی کو مضبوط بنانا ہو گا، انہوں نے روسی صدر ولادیمیر پیوٹن کے ساتھ دوطرفہ تعلقات کو فروغ دینے کے نئے منصوبوں پر کام کرنے پر بھی آمادگی ظاہر کی۔

واضح رہے کہ شی روسی صدر کی دعوت پر 20 سے 22 مارچ تک ماسکو کا دورہ کریں گے،کریملن کے مطابق دونوں ممالک کے رہنما جامع دوطرفہ شراکت داری کو مزید فروغ دینے، روس اور چین کے درمیان اسٹریٹجک تعامل اور یوکرین کے تنازع پر بات چیت کریں گے۔

چینی رہنما نے کہا کہ روس کے دورے پر جانے کا میرا مقصد دوستی، تعاون اور امن کو مضبوط بنانا ہے، انہوں نے مزید کہا کہ دونوں ممالک کے تعلقات نے اپنی پوری تاریخ میں مشکل راستہ طے کیا ہے اسی لیے روس اور چین کی دوستی کو برقرار رکھا جانا چاہیے۔

چین کے صدر نے کہا کہ روس اور چین کے تعلقات 70 سال سے زیادہ عرصے سے انتہائی ہنگامہ خیز اور اتار چڑھاؤ کے راستے پر چل رہے ہیں، پیچھے مڑ کر دیکھا جائے تو ہمیں گہرائی سے احساس ہوتا ہے کہ روس اور چین تعلقات کی موجودہ سطح تک پہنچنا مشکل تھا،ہمیں چین اور روس کے درمیان ان مستحکم تعلقات اور دوستی کو احتیاط سے برقرار رکھنا چاہیے۔

انہوں نے یہ بھی کہا کہ تاریخ سے پتہ چلتا ہے کہ ماسکو اور بیجنگ عالمی بحران کے باوجود اپنے تعلقات کو فروغ دینے میں کامیاب رہے ہیں، اطلاعات کے مطابق دونوں ممالک کے صدور کی ملاقات 20 مارچ کو ہوگی اور اہم مذاکرات 21 مارچ کو ہونے والے ہیں۔