ملائیشیا اور بھارت کا تجارتی و دفاعی تعاون بڑھانے پر اتفاق

ملائیشیا اور بھارت کا تجارتی و دفاعی تعاون مزید گہرا کرنے پر اتفاق

ملائیشیا اور بھارت نے باہمی تعلقات کو مزید مضبوط بنانے کے عزم کا اعادہ کرتے ہوئے تجارت، دفاع اور جدید ٹیکنالوجی سمیت مختلف شعبوں میں تعاون بڑھانے پر زور دیا ہے۔

ملائیشیا کے وزیرِاعظم انور ابراہیم اور ان کے بھارتی ہم منصب نریندر مودی کے درمیان پوتراجایا میں ہونے والی ملاقات میں دونوں ممالک نے تجارت و سرمایہ کاری، غذائی تحفظ، دفاع، صحت، سیاحت اور نیمہ ہادی (سیمی کنڈکٹر) صنعت میں شراکت داری کو وسعت دینے پر اتفاق کیا۔

ملائیشیا کے وزیرِاعظم نے کہا کہ دونوں ممالک کے درمیان ہونے والا یہ تعاون جامع نوعیت کا ہے اور دونوں حکومتوں کے مضبوط عزم کے باعث اس پر تیزی سے عمل درآمد ممکن ہوگا۔ انہوں نے امید ظاہر کی کہ دو طرفہ تجارت کا حجم گزشتہ سال کے 18.6 ارب ڈالر سے تجاوز کرے گا۔

انور ابراہیم نے مزید کہا کہ ملائیشیا اور بھارت سرحد پار لین دین میں مقامی کرنسیوں کے استعمال کو فروغ دینے کی کوششیں جاری رکھیں گے، جبکہ ملائیشیا بھارتی قونصل خانے کے صوبہ صباح میں قیام کی بھی حمایت کرے گا۔

دوسری جانب، بھارتی وزیرِاعظم نریندر مودی نے کہا کہ بھارت اور ملائیشیا کے تعلقات ایک خصوصی شراکت پر مبنی ہیں اور دونوں فریق مختلف شعبوں میں تعاون کو مزید وسعت دینے کے لیے پرعزم ہیں۔ انہوں نے دہشت گردی کے خلاف تعاون، انٹیلی جنس شیئرنگ اور بحری سلامتی کو مضبوط بنانے پر بھی زور دیا اور کہا کہ دفاعی تعاون کو مزید جامع بنایا جائے گا۔

اس ملاقات کے دوران دونوں ممالک کے درمیان 11 اہم معاہدوں پر دستخط بھی کیے گئے، جن میں نیمہ ہادی صنعت، بحرانوں کے انتظام اور امن کے تحفظ سے متعلق معاہدے شامل ہیں۔