مقبوضہ بیت المقدس میں امریکی قدم، فلسطینی مزاحمتی تنظیم کا سخت ردعمل

مقبوضہ بیت المقدس میں امریکی قدم، فلسطینی مزاحمتی تنظیم کا سخت ردعمل

فلسطینی تنظیم جنبش مجاهدین فلسطین نے مقبوضہ بیت المقدس میں امریکی سفارت خانے کی جانب سے صہیونی بستی افرات میں قونصلر خدمات فراہم کرنے کے اقدام کی شدید مذمت کی ہے اور اسے جرم میں براہِ راست شراکت قرار دیا ہے۔

تنظیم نے اپنے بیان میں کہا کہ بستی «افرات» بیت لحم اور الخلیل کی فلسطینی اراضی پر جبراً قائم کی گئی ہے اور وہاں سرکاری امریکی خدمات کی فراہمی بین الاقوامی قوانین کی کھلی خلاف ورزی ہے۔

بیان میں مزید کہا گیا کہ غیر قانونی بستیوں کے اندر سرکاری خدمات کی فراہمی دراصل ان بستیوں کو سیاسی و قانونی جواز دینے اور مغربی کنارے کے “تدریجی الحاق” میں عملی شرکت کے مترادف ہے، جسے صہیونی حکومت نافذ کر رہی ہے۔

تنظیم نے امریکہ کو ان پالیسیوں کا مکمل ذمہ دار ٹھہراتے ہوئے کہا کہ مغربی کنارے کے الحاق کی مخالفت سے متعلق امریکی بیانات محض فریب ہیں۔ بیان میں امریکی سفیر  کے حالیہ مؤقف کو بھی اسی پالیسی کا تسلسل قرار دیا گیا۔

یاد رہے کہ امریکی سفارت خانے نے سوشل میڈیا پلیٹ فارم ایکس پر اعلان کیا تھا کہ وہ پہلی بار 1967 کے بعد مغربی کنارے کی صہیونی بستیوں میں اپنے شہریوں کو قونصلر خدمات فراہم کرے گا۔ ابتدا میں پاسپورٹ سے متعلق خدمات بستی «افرات» میں دی جائیں گی، جبکہ آئندہ دو ماہ میں «بیتار عیلیت» سمیت دیگر مقامات پر بھی اسی نوعیت کی سرگرمیاں متوقع ہیں۔

فلسطینی تنظیموں کا مؤقف ہے کہ یہ اقدام بستیوں کی توسیع اور فلسطینی علاقوں پر صہیونی کنٹرول کو مزید مضبوط کرنے کے مترادف ہے۔